Indawm kun hman a ni lo - Moura

Premier League match an khelh hmasak berah Tottenham Hotspur an chak lo a, forward Lucas Moura chuan lungngaia indawm kun hman an nih loh thu a sawi. Nilaini zan hian Europea League qualifying khel turin Lokomotiv Plovdiv an tlawh zui a ngai dawn.

Jose Mouronho naute hi an mikhual Everton lakah 1-0 in an tlawm a, team dang ang bawkin Spurs hian season thar inbuatsaihna hun mumal an nei lo. A bik takin striker rinrawl Harry Kane chuan ni khat bak training a zawm hman lo.

Moura chuan, "Theihnghilh nghal a ngai, kan chak lohna leh chet sualna khan rilru paukhauhna leh chak duhna thinlung min siamsak zawk rawh se. Thawhrim a ngaihzia zir chhuak thar ila, kan elpui te an ṭha hle tih a lang bawk.

"Tunah chuan Europa League group stage kan kai theih dan ngaihtuah a hun tawh, season hmasa a zawh har avangin engkim mai hi a chep vek niin a lang. Nilaini zana match kan neih hnuah Pathianni zanah league kan khel zui leh dawn, tha thlah a thiang lo," a ti.

North London club hian nomawi duh vangin manager Mourinho chu hlawh hnem takin an ruai. Portuguese manager hian season hmasa laklawh lai aṭangin hna a ṭan chauh a, title a lakpui rih lo. Tun season-ah chuan eng inelna emaw berah tal chuan hlawhtlin an tum ang.