Police-in MPL club Chhinga Veng an hneh
Mizoram Police-in MPL khel tlak tur khawpa an la ṭhat zia pho chhuakin nimin tlai khan Chhinga Veng FC chu 3-2 in an hneh a, MFA Super Cup quarterfinal-ah Dinthar FC an hmachhawn ang.
Inhliam
Chhinga Veng FC-in K. Lalthlahlova leh Lalramfel-puia te an la chhawr thei lo a, damloh vangin MS Dawngliana leh H. Lalmuankima te chu inkhel bul ṭantu zingah coach Lalremtluanga'n a dah ngam lo bawk. Mizoram Police lamin Lalfakzuala damloh vang thoin an chhawr thei lo a, Armed Veng tlangval hi squad-ah dah a ni lo.
Goal nga
Inkhelh ṭantirhah ruah a sur nasat avangin minute thum lek an khel hman chauh tihin chawlh a ni a, amaherawhchu thli leh ruah han hnuah inkhel hmuh-nawmna a reh tel lo. Lalnunmawia hmangin Police-in goal hlauawm hmasa ber a nei a, Chhinga Veng keeper Vanlalawmpuia Ralte-in a dang ṭha hle.
Mizoram Police tlar hma hmuhnawm viau mah se tlar hnung erawh hun tawp thlengin a nghing tluan. Minute 14-na leka Joseph Lalnunpuia cross chu Police right back Lalropuia'n an lamah an tilut a, Chhinga Veng ṭantuten an veng hming ring taka lamin 'nuam nuam nuam' tihin an chhunzawm a, result ṭha an neih hunah Chhingcows boruak a lian lehzual ang.
Police-in an nawr let nghal a, vei lam aṭanga F. Lalrinpuia (Valpuia) cross chu Lalbiakhlua'n ṭha takin pet mah se Chhinga Veng keeper AwP-a'n a dan sak a, a per chu Lalsangbera'n petin goal ban a per.
Police player zinga hmuhnawm ber chu Sangbera a ni a, Dawrpui Veng tlangval hian minute 28-naah an si phurh sut nan goal ṭha bik a khung. Chhinga Veng FC-in hma hruai nawn an tum luat an tuar a, left back Lallawmzuala'n ding lama awm Biaktea tan a vawrh a, Police winger hian Chhinga Veng left back Rozama um phak lohin ball a lalut a, minute 40-naah hmahruaina goal a khung.
Second half-ah Chhinga Veng FC-in Dawngtea an luhtir a, Bawngkawn tlangval hian B. Zoramthanga handball vanga an penalty hlawhchhuah chu minute 57-naah goal-ah a chantir. MPL club Chhinga Vengin chak tumin H. Lalmuankima an dah lut leh a, amaherawhchu Biaktea an ven hneh loh an tuar. Police winger hian ding lam kil aṭangin minute 80-naah ball ṭha bik a vawrh lut a, Valpuia'n nalh takin a tauh lut.
Hun pawimawhah Police keeper Vanlalhriata tawnhriat neih ṭhat a lang a, Chhinga Veng forward Khawpuimawia cross sual chu a dang ṭha hle. Goal dang a luh belh tawh loh avangin Police an chak a, tun season-ah First Division club zinga MPL club hneh hmasa ber an ni.
Eng nge an sawi?
Chhinga Veng mana-ger Lalremruata chuan, "Inhliam kan ngah lutuk kan tuar a, Ronald Zothan-zama pawh inhliam chungin ka luhtir a ṭul phah a ni. Kan khelh danah lung-awi lohna tur a awm lo a, I Day Football-a kan
chetṭhat loh vangin inrin-tawkna kan tlakchham bakah vanneihna kan nei tawk lo bawk," tiin Vanglaini palai a hrilh.
Mizoram Police coach Ṭialthawnga chuan, "A vannei zawka kan ṭan avangin kan lawm hle a ni. Kan beisei
angin kan la khel chhuak lo a, an goal hnih khungna kha kan tihsual vanga lut a ni. Fakzuala inhliam vang hian kan goal nawr a la na tawk lo a, kan inkhelh leh hunah chuan tun aia
ṭha zawkin kan khel tawh ang," tiin vanneih vang chauha chak an nih thu a sawi.