Dinthar tan Samuel-a goal
MFA Super Cup match hmasa berah Dinthar FC-in division hniam zawk Ramhlun FC lakah an game ṭha ber lantir lo mah se captain Samuel Laltlanthanga goal hmangin quarterfinal an lut.
Nimin chhun Lammual inkhelah hian Samuel-a'n minute 39-naah freekick aṭangin a khung a, Ramhlun FC keeper Laldailova Thangluah-in a dang thei lo.
Hemi hnu hian Dinthar forward Michael Lalremruata'n freekick aṭangin crossbar a pet per bawk. Second half-ah Dinthar winger Lalruatpuia'n goal khung theihna tur khawpin chance ṭha insiam chawp mah se a hmawr a bawk thei lo a, substitute Chawngthansanga'n goal ngei tura ngaih a pet lut lo.
Dinthar FC-in goal khung theihna tur an ngah avangin Ramlun FC lakah an chungnung tihna a ni lo a, first division club hian MPL club hi an khing tawk hle.
Minute 58-naah Ramhlun FC player Lalruatfela chu yellow card vawi hnih hmuh vangin hnawhchhuah a ni a, referee thutlukna hi a tuartu lamin nâ an ti hle. Ramhlun FC-in player kim loa an khelh hnuah pawh an goal bawh a la na tho a, defender Lalṭhazuala'n hnai tak aṭangin a tlawh lut thei lo a, Lalnunmawia'n a club hlui lamah goal a khung thei lo bawk.
Minute 85-naah Dinthar FC-in match day squad-a awm lo player an dah lut a, hriatchhuah hnuah Saihmingthanga hi khelh zui phal sak ni loin player 10 ve vein hun tawp thlengin an khel.
First division club lam an chak loh danah an lungawi lo a, coach C. Lalngaihawma chuan, "Kan player an hnawhchhuah dan kha thutlukna dik lo a ni a, match day squad-a tel loh an dah luh vangin hrem an tuar loah kan ngai bawk. Substitution siam sual kha keini lam chuan hun khawhralnaah kan ngai a, kan inkhelh dan aṭang kha chuan Dinthar FC hi MPL club ni mah se keini aia an chungnunna ka hmu lo," tiin Vanglaini palai a hrilh.
Dinthar FC coach Lalchhuanawma chuan, "Kan khel ṭha tawk lo a, training kan pha lo hle a ni. Insiamṭhatna tur tam tak kan nei a, chutihrualin kan tum ber chu hnehna chan a ni," tiin khel ṭha lo mah se an hlawhtlin thu a sawi.
Substitution siam sual sawiin L.Ch-a chuan, "Kan tihsual liau liau a ni a, inkhelh hmaa player check-na leh substition siam dawnah referee-in an hmuh loh bawk avangin kan mawhphurhna tawp chu a ni bik lo," tiin an tihluih a nih loh thu a sawi.