City ropui zanah Aguero a langsar

Manchester City chuan Cham-pions League playoff first leg-ah Steaua Bucharest chu 5-0 in an sawp a, Etihad Stadium-ah second leg khelh leh tur a nih avangin City hian Champions League an khel dawn ngei niin a lang ta.

Pep Guardiola-a naute zingah Sergio Aguero a langsar ber a, Argentine striker hian penalty vawi hnih lai a pet goal loh hnuah a hmingchhe tur thai bo nan goal thum a khung chhunzawm a, khelmualah a langsar fal hle.

Manchester City tana goal hmahruai khungtu chu David Silva a ni a, Aguero hattrick siam karah Spanish striker Nolito chuan goal khat a khung ve bawk - Pep-a hnuaia City attacking game a hmuhnawm nghal.

Buai ve lo Aguero

Manchester City striker Sergio Aguero-a'n first half-ah City penalty hlawhchhuah chu vawi hnih ngawt a pet goal lo - vawi khat dan sak a ni a, vawi khat erawh bar chung lamah a thlawh chhuak thung!

Striker naran tan chuan match chawhma lama penalty vawi hnih pet goal loh hi buaina tham a ni a, Argentine striker erawhin buai nan a hmang lo - David Silva-a'n goal hmahruai a khung aṭanga minute 28-naah City goal hnihna a khung a, vei lam kilah mawi takin a pet lut.

Chawlhlawk hman a ni a, City hmahruaina chu 2-0 a ni. Second half ṭan aṭanga minute li naah Celta Vigo aṭanga City zawmtu Nolito-a'n City goal thumna a khung a, a bak zawng chu Sergio Aguero chan a ni.

Kum 28-a upa striker hian Nolito nen mawi taka ball an inpek kual hnuah City goal lina a khung a, hun tawp nan minute khat chiah a awm tawh tihin Steaua Bucharest penalty area-ah duh thala ball khawih kualin goal ngana a khung leh bawk.

City an chungnung

Inkhel ṭantir aṭangin City-in inkhel an thunun nghal a, Romanian club hian tih theih an nei tlem hle. City striker thar Nolito-a'n goal a khung bakah vawi hnih lai woodwork a pet per a, a hmuhnawm hle.

Manchester City manager Pep Guardiola-a'n Premier League-a an match hmasa bera goalkeeper Joe Hart a awl tir hnuin a vawi hnih nan bench-ah a ṭhuttir leh a, Willy Caballero chu si ban nghaktuah a hmang.

Kum 34-a upa keeper hian inkhel ṭantir lamah ball pet chhuak tura tlanchhuah a ngai tih loh chu hna a nei meuh lo a, khelmual chhunga inkhel entu ang mai chauh a ni.

Sterling-a'n ngai a awh!

Liverpool aṭanga pound mak-taduai 49-a Manchester City zawmtu Raheem Sterling-a'n Etihad Stadium-a a season hmasa berah beisei a phak lo a, Euro 2016-ah lah beisei a phak loh avangin England fan-ten thawn haw a nih theihna turin campaign an nei hial!

Mahse, English player man--to ber hian Pep Guardiola hnuai-ah inrintawkna nei tharin Sun-derland laka an match hmasa berah hmuhnawm khawpin a khel a, penalty a hlawh chhuak.

Romania-ah pawh kum 21-a upa winger hian a tlan chakna leh ball thiamna hmangin vawi tam Steaua Bucharest tlarhnung a chhaih buai a, City penalty hmasak zawk hi a hlawhchhuah niin Silva goal khung theihna turin a thawh hlawk hle bawk.

Khelmual pawn buaina

Manchester City-in manager atan Pep Guardiola an lalut a, Spanish manager hian a match hmasa berah keeper Joe Hart leh Yaya Toure a chhawr duh lo a, Romania-ah pawh player pahnih hi a chhawr lo a, Toure phei chu squad-ah pawh a awm lo!

Guardiola-a'n inkhelh hmain Joe Hart aia Willy Caballero a thlan chhan chu a chet ran zawk vang a nih thu a sawi a, a game mila khel tur player a duh thu a sawi. Khawthlang media te chuan City hian Barcelona keeper Claudio Bravo chu lakluh an remti tawh niin an tarlang hial a, Hart hian loan-a chhuah a duh niin an tarlang bawk - Everton leh Sevilla chu England international keeper duhtu langsar an ni.

Barcelona-ah Pep Guardiola-a'n Yaya Toure a mamawh lo a, City-ah pawh Ivorian midfielder hi a la mamawh chuang lo! Bayern Munich manager hluiin passing game khelh a duh ṭhin a, Toure erawh rei tak ball keng chunga khel ṭhin a ni a, nipui transfer bazar hmaa a chhuak a nih pawhin a mak lo ang.

Aguero faktu Pep

Manchester City manager Pep Guardiola chuan goal thum khung-tu a striker Aguero fakin, "Sergio-a'n penalty a pet goal loh kha chu game-in a ken tel ve reng a ni. A pawimawh lai ber chu vawi hnih lai a pet goal loh hnuah pawh hnual loa inkhel a hmachhawn zel kha a ni," a ti.

Guardiola chuan sawi chhun-zawmin,"Vawi engzat nge i tawlh thluk tih hi thil pawimawh a ni lo a, vawi engzat nge i thawh leh? tih hi a pawimawh lai zawk chu a ni," tiin a striker chuan hnual loa a khelh chhunzawm vangin goal thum a khung niin a sawi.

Spanish manager chuan goal khung lo mah se khel ṭha tak Raheem Sterling fak nghalin, "City hian season hmasaa Sterling lei nachang an lo hria kha chu an fing thlawt a ni. Thiamna sang tak nei, che rang leh thawkrim tak a ni a, player danglam bik a ni. Mahse, Sterling hi kum naupangte chauh a la ni a, inzirna tur tam tak a la nei a ni," a ti.

City boss chuan tun sea-son-a an tum hmasak ber chu Cham-pions League group stage inhlankai a nih thu a sawi a, a naute khelh dan leh an result-ah chuan a lawm thu a sawi bawk.