Cancer ngam loh Lange

Santiago Lange chu nikum khan cancer vangin a chuap zai niin paih ṭhen a ni. Argentine sailor hi a natna avangin a hnual phah lo - Rio Olympic-ah inlanin Nacra 17 mixed category-ah a ṭanpuinu Cecilia Carranza Saroli nen gold medal an dawng a, pahnihna chu Australia niin Austria chuan bronze an dawng thung.

Kum 54-a upa Lange hi kumin Olympic-a infiammi inlan zinga upa ber niin 2004 leh 2008 khan Carlos Espinola nena ṭang dunin bronze medal a lo dawng tawh bawk a, kumin hi Olympic-a vawi ruk a inlanna a ni. Nikum khan a natna hi hriatchhuah ni mah se huaisen taka tuarin a tum ram a hlen chhuah theih phah a ni.

Lange chuan, "Ka natna ka hriat tirh a-
ṭanga tun thleng hian thil tam tak ka tawng leh tawh. Infiamna hian rilru huaisenna leh chakna min siam sak a, tui chunga infiamna aṭanga ka thil hmuh chhuah tak chu thil harsa leh khirhkhan pawh tawk ṭhin mah ila chawl loa hmalam ka pan ngam a pawimawh tih hi a ni," tiin a sawi.