110m hurdles champion McLeod

Rio Olympic neih mekah Jamaica sprinter-te intlansiakah an langsar chhunzawm zel. Mipa leh hmeichhe 100m intlansiakah gold an lak hnuin Thawhlehni zan khan mipa 110m hurdles intlansiakah Jamaica tlangval tho Omar McLeod chu pakhatna a ni.

Kum 22-a upa McLeod hi tun hma lama a sulhnu thlirin chak ber tura ngaih ni bik lo mah se inelna takah a chungnung hle a, second 13.05 chiah hun hmangin pahnihna Spain tlangval Orlando Ortega chuan silver dawng turin second 13.17 a mamawh thung. France aiawhtu Dimitri Bascou (13.24) chu pathumna a ni bawk.

McLeod chuan, "Nikum leh tuna ka dinhmun inthlauhna ngaihtuah chuan a awihawm loh zawk hial awm e. Olympic champion ni tur hian dawhtheihna ka neih a ngaih bakah midang beih aia nasaa ka beih a ngai a, a tawpah a rah a rawn lang," a ti. Nikum Beijing World Champoinship-ah khan MCLeod hi parukna ni mah se beidawng mai loa a thawhrimna a rawn lang ta a ni.

Pahnihna dinhmun luahtu Ortega hian McLeod hi second 0.12 in thlau mah se an ram tan chanchin ṭha a ni. Kum 2004 hnu lamah Spain hian track and field bikah Olympic medal an la dawng leh lo a, he an record duhawm lo tak hi a rawn thaibo.