RIO olympic 2016 Hmeichhe football-ah Brazil beiseina a thamral
Rio Olympic neih mekah Brazil hmeichhe football team-in a vawi khat nana Olympic gold medal lak an tumna chu a thamral ta - semifinal-ah Sweden nen goal khung loa an inhnehtawk hnuin penalty hmanga chak zawk zawn a ni a, Sweden hian 4-3 a hnehna changin final an lut ta zawk a ni.
Brazil-in inkhel thunun zawk mah se group stage-a 5-1 a an lo sawp tawh team lakah goal an khung thei lo a, hun tawp hnaih tawh lama Formiga-i ball tauh Swedish keeper Helvig Lindahl-i'n ṭha taka a lo dan sak te chu an sawi rei ve hlein a rinawm.
Brazil coach Vadao chuan, "Tlar hnung lamah an inremkhawm tlat a, min inhneh-tawkpui turin theihtawp an chhuah a ni. 1-0 leka chak an pawiti lo a, chutianga an chak thei lo a nih chuan penalty pet mai kha anni chuan pawi an ti lo," tiin an khingpui ten defensive game an khelh avanga chak a harsat thu a sawi.
Vadao chuan sawi chhun-zawmin, "Sweden game plan hi keia lo sawisel theih a ni lo a, an tum dana khelin an hlawhtling a ni mai. Keimahni mai bakah USA lakah result
ṭha tak an hlawh chhuak tawh a ni. Stadium ropui takah kan inkhel a, hetiang em em hian ka la lunghnur ngai lo. Minute 120 chhung khan kan theihna zawng zawng kan pe a ni," a ti.
Semifinal lehlamah Ger-many chuan London 2012 bronze medallist Canada chu Melanie Behringer leh Sara Dabritz goal khung hmangin 2-0 in an hneh a, final-a Sweden hmachhawn turin an inpetkai.
Sweden final kalkawng
Sweden semifinal kalkawng hi a ngaihnawm hle. Group E-ah Brazil, China leh South Africa te nen awm hoin vawi thum inkhel an hmachhawnah vawi khat chiah hnehna changin (1-0 South Africa) vawi khat an khingpui an inhnehtawkpui a (0-0 China), vawi khat an tlawm thung (1-5 Brazil).
Group stage-a pathumna nichungin quarterfinal an lut a, Group G pakhatna United States of America barakhaihin hun pangngaia 1-1 a an inhnehtawk hnuah penalty hmangin 4-3 in an chak a, semifinal-ah a thlengtu Brazil an hneh leh ta!
USA goalkeeper Hope Solo chuan defensive game khel ṭhin Sweden hi an khelh dan avangin 'mi ṭawmkai lo awmkhawm' tiin na takin a sawisel a, Sweden coach Pia Sundhage chuan, "Ani thusawiin min tibuai lo, ani chu USA-ah a haw dawn a, kei chu Rio-ah ka kal dawn," tiin a chhang a, tunah chuan final hial an khel dawn ta!
Final-a Sweden hmachhawn tur Germany-in Group F-a pahnihna nichungin quarterfinal an lut a, group stage match thum an khelhah vawi khat chak (6-1 Zimbabwe), vawi khat inhneh-tawk ( 2-2 Australia) leh vawi khat tlawm (1-2 Canada) an nei. Quarterfinal-ah China 1-0 a hnehin semifinal-ah Canda chu 2-0 in an hneh leh ta a ni.