Kaka-a'n Milan a theihnghilh lo

Kaka chuan Italian champion vawi 18 ni tawh AC Milan chuan tunhma lama an ropui tawhna ang kha an neih let leh theih ngei a beisei thu a sawi chhuak.

Brazil international Kaka hian Milan tana a khelh laiin Serie A, Champions League, UEFA Super Cup leh Club World Cup nomawi te a chawi pui a, kum 2007 khan Ballon d'Or chawimawina a dawng nghe nghe.

Kum 2011 hnulamah Milan hian ropuina an chang leh tawh rih lo a, league bikah pathumna, pariatna leh 10-na te niin season hmasa khan pasarihna an ni.

Kum 34-a upa Kaka chuan, "Hnuhma ropui tak an neih tawh avangin khawvela club lian berte zinga mi an la ni reng. History hi khelmual chhungah lang chhuak kher lo mah se club ropui tan lo chuan neih theih a ni lo. Nakinah chuan he club hian tunhma lama a lo ropui tawhna ang kha a tawn leh theih ngei ka beisei," a ti.

Kaka chuan sawi chhunzawm-in,"Ka hmuh dan chuan Milan hian vawilehkhata hmasawn duai duai chu a thei kher lo ang. Zawimuangin hmasawn zel tum se a fuh ang. A hmasain Europa League khel se, chumi hnuah Champions League a ni leh ang," tiin a sawi.