US Open khel tur Del Potro

Kumina Grand Slam hnuhnung ber US Open chu August 29 - Sep-tember 11 chhung hian khelh a ni dawn a, he hunah hian Juan Martin del Potro chu wildcard hmangin a inlan dawn.

Tennis inelna buatsaih a nih hian player ṭhenkhat hnenah wildcard pek a ni ṭhin. Inelna buatsaihtute hian tunhma lama sulhnu lo nei ṭha tawh, tun din-hmuna chhan hrang hrang vanga ranking hniam si, inelna neih tura hlu biksi an duhsak zawng hnenah wildcard an pe ṭhin - tennis chauh ni loin infiamna chi dangah pawh wildcard hi hman ṭhin a ni bawk.

World number 4 hlui Del Potro hian kum 2009 khan khatih laia an vanglai hmangtu Roger Federer leh Rafael Nadal te hnehin US Open nomawi a lo chawi tawh. Mahse, Argentina tlangval hi a vanduai a, a ban rek ṭum thum ngawt zai a ni. Kumhnih a inkhelh mumal theih loh hnuah January thla khan Australian Open-ah a inlan ve leh thei chauh a ni.

Tun dinhmuna ATP ranking 141-na Del Potro hi Rio Olympic-ah inlanin a match hmasa berah world number 1 Novak Djokovic a hneh a, semifinal-ah Nadal a hneh bawk. Final-ah Andy Murray hneh zo lo mah se an ram tan silver medal a dawng.