Dar 12:00-ah Zo United vs 1st Bn MAP Academy
Shillong Lajong FC coach Thangboi Singto-a'n I Day football group match-a an hma-chhawn zinga ṭha a tih ber chu Zo United ni mah se, 1st Bn MAP Football Academy coach Lalramhluna'n a hlauh phah lo, "Kan club duh tak kan pawt fuh a ni," a ti mauh mai.
Samsung 3:16 Plan Solution MFA Super Cup Last 16 chu vawiin hian Lammualah khelh chhunzawm a ni dawn a, chhun dar 12:00-ah Zo United leh 1st Bn MAP Football Academy an inkhel ang.
Rawlthar zam lo
1st Bn MAP Academy coach Ramhluna hian huai taka sawi turin tualchhung football-ah sulhnu ṭha tak a nei. Zo United pian hma hian I Day Football-ah 1st MAP Academy hi an champion tawh a, hei chauh hi a ni lo - Chanmari FC captain Lalrinchhana, Chanmari West goal khung khawl R. Laldanmawia leh player ṭha tam tak an chher chhuak tawh.
Tuna player-te hi nakin lawka MPL club-te inchuh tur an ni thei a, phai lam academy leh club-te zawm tur an ni thei bawk.
Seeded an nih avangin 1st Bn MAP Academy hian first round an khel lo a, Durtlang Ramthar leh Kanan FC lakah goal 11 khungin goal khat chiah an chhuah. A chhuanawm lai erawh goal 11 khungtu hi player pakua an ni a, goal khung tur player an kawl tih a chiang
Kan hlau lo
Police Academy coach Ramhluna chuan, "Ka club duh tak kan pawt fuh a, MPL club zinga kan zuam ve berte zinga mi kan hmachhawn dawn. Kan nauten an khingpui tur hi an hlau lo a, chak loh inring sain Lammual kan pan dawn lo. Goal khung thei player kan ngah a, Zo United khel tur chuan kan mamawh vek lo. Team dinhmun kan hria a, kan khingpuite ṭhatna lai ber tichhe thei tur player ka luhtir dawn," tiin Vanglaini palai a hrilh.
Team tha zawk?
Zo United coach Vanlalrova pawhin, "1st Bn MAP Academy hi an fitness a chhe ngai lo. Hneh sa anga kan khel a nih chuan kan chak lo thei tih kan hria. Ka naute pawh MPL club kan hmachhawn ang thoa khel turin ka fuih. Team ṭha zawk kan ni a, I Day Football-ah kan chetsual tawh avangin MFA Super Cup-ah chuan chetsual kan tum tawh lo," tiin a sawi.
Zo United hian Ramhlun North FC nen goal awm loa an inhnehtawk hnuah Dinthar FC hnehin beiseina sang tak nei mah se, Bethlehem VT an draw hnuah Shillong Lajong an hneh loh avangin I Day Football-ah group stage an paltlang lo.
MFA Super Cup-ah hian Rova hian Chanmari West aṭanga an lakluh Lalnunsanga (Tale-a) leh Luangmual aṭanga an lakluh Hmingthanzauva te a la chhawr thei dawn lo a, amaherawhchu player pahnih tel lo hian I Day Football-ah game ṭha tak an khel tawh.
Zo United hian an khingpui tur aiin Lammual an hre chiang zawk a, an player-te'n tawnhriat an nei
ṭha zawk a, chak zawk tur erawh hriat lawk har tak a ni thung.
SUPPORTER-TE ṬHUTNA TUR
Zo United - K. Kawla Stand leh S. Malsawmtluanga Stand
1st Bn MAP Academy - Zomuanthanga Stand leh Zohminga Zote Stand
Neutral Supporter - Tlang
1st Bn MAP Academy - Last 16 Kalkawng
Second Round
1st Bn. MAP Academy 6 - 1 Durtlang Ramthar
1st Bn : Lalṭanpuia 45'; Lalrinpuia 58'; C. Lalthansanga 65'; Lalhunliana 82'; B. Zothanliana 84; Isaak Vanlalruatfela 87'
DUR : Lalhlankima 51'
Third Round
1st MAP Football Academy 5 - 0 Kanan FC
MAP: Isaak Lalruatfela 53', 57', 73'; C Lalropianga 64'; Lalṭhakima 87'