Basti leh Poldi thlahna inkhel

Germany chuan tun hnaia ram tana inkhelh chawlhsan captain hlui Bastian Schweinsteiger leh forward Lukas Podolski te tan August 31-a Finland nen Monchengladbach-a friendly match an khelh tur chu an hlan dawn.

Ram tana match 120 kheltu Schweinsteiger leh Podolski (129) te hi 2014 FIFA World Cup champion team-ah khan an tel a, Euro 2016 zawh hnuah ram tana inkhelh an chawlhsan.

Finland nen an inkhelh turah hian banner-ah 'Ser-vus, Basti' (Goodbye, Basti) tih leh 'Tscho, Poldi' (Cheers, Poldi) tih inziahna tarlan a ni ang.

Schweinsteiger chuan, "Monchengladbach-a inkhel tur hi a hlu bik hle ang. German Football Federation leh fan-te chungah ka lawm hle. A tawp nan danglam taka Germany jersey kan ha leh tur hi a hlimawm a ni," a ti.

German coach Joa-chim Low chuan, "Bastian leh Lukas te hian German national team tan hnuhma ropui tak an hnutchhiah a, DFB lamin hetiang hun a buatsaih hian anni pahnih ropui zia leh pawimawh zia a tilang chiang," a ti.

Arsenal striker hlui Po-dolski erawh Galatasaray leh Fenerbahce ten Tur-kish Super Cup an khelh ṭuma a hliam vangin he hunah hian a inlan thei dawn lo.

Podolski chuan, "Ka thawhpui tawhte chungah ka lawm a, hetiang hun hlu bik min buatsaih sak huna hliam vanga ka inkhel thei lo tur hi pawi ka ti hle. Fan-te mangṭha tur tal chuan ka inlan theih ka beisei," tiin a sawi.