World number 2 hnehtu Sindhu

Indian shuttler Pusarla Venkata Sindhu chuan world number 2 Wang Yihan hnehin Rio Olympic hmeichhe badminton singles semifinal a lut.

World number 10 Sindhu hian China nula Wang Yihan chu 22-20, 21-19 a hneh turin minute 54 hun a hmang. Tun hma lama an lo intawn tawhna nen Hyderabad nula hian Yihan hi vawi li a hnehna chiah a ni bawk. Zanin dar 5:50 hian semifinal-ah Japan nula Nozomi Okuhara nen an inhmachhawn leh ang.

Quarterfinal inkhelah World Cham-pionship bronze medallist vawi hnih ni tawh PV Sindhu-i'n bul a ṭan fuh lo zawk a, 11-8 in a hnufual hnuah 14-14 nih pui lehin minute 29 chhungin game hmasa zawk a la - Wang-i'n unforced errors a neih fo a tuar. Set hnuhnung zawhah pawh China nula hian attacking game ropui rawn khel mah se tawn hriat nei tlem zawk Indian shuttler a talbuai duh lo a, a che vel a ran bakah a defending ṭhat a chak pui.

Sindhu chuan, "Point khat chuah hmuh belh tur pawhin beih nasat a ngai hle. Wang kha a khelh ṭhat ve bawk avangin ka tan thil a awlsam lo hle a, min nawr nat avangin nawr let vak ai chuan lo inven kha ka ngaipawimawh hmasa a, ka tifuh ta zawk a ni. Game hmasaah 20 ve ve kan hmuh hnu phei kha chuan ka chiai lek lek," tiin inkhel inhehtawk taka London Olympic silver medallist Wang nena an inkhelh chungchang a sawi.

Semifinal thlirzuiin, "Inkhelah chauh rilru kan pek a, kan theihna zawng zawnga kan khel chhuak a nih chuan hnehna chan theih a ni. Ka thlen chin hi sang tawh viau mah se ka la duh tawk lo a, a tawp thlen ka tum," tiin gold medal a beisei ngam thu a sawi tel bawk.

Kum 21-a upa Sindhu hi India hmeichhe zingah Olympic badminton inelnaa semifinal lut thei hmasa ber dawt a ni ta. London Olympic 2012-ah khan Saina Nehwal chuan semifinal lutin bronze medal a lo dawng tawh - kuminah erawh world number 1 hlui Saina hi second round-ah a tla tawh thung.

India tan Sindhu hi medal lak beiseina langsar ber pakhat a ni mek a, semifnal-ah hian a chak a nih chuan gold emaw silver emaw a dawng dawn tih a chiang a, a chak lo zawkah a ṭang a nih pawhin bronze medal beiseina a la nei thei dawn a ni.