Chanmari an tho chhuak ang em?

I Day Football 2016 semi-final-ah Chanmari FC-in team ṭha lo zawka ngaih Ramhlun North FC an hneh lo. Group stage an patlang tirha final lut chiang saa inngai Chanmari FC an ṭawng huai ngam tawh lo a, hei hi Zarkawt FC tan thu lawmawm nge thu lungaihthlak tih hriatthiam a har hle.

Vawiin tlai dar 2:30 hian veng inṭhenawm Zarkawt FC leh Chanmari FC te MFA Super Cup Last 16-ah an inhmachhawn dawn.

Chanmari FC manager C. Lal-thanmawia chuan, "Football-ah chuan chak chiang sa an awm lo. Zarkawt hneh tur hian kan theihna zawng zawngin kan khelh a ngai a, chak turin kan ṭhat theih dan berin kan khel ang," tiin a ṭawng fimkhur hle.

Tualchhung inlena liana champion vek tawh Chanmari FC hi an ṭhenawm veng hi football zirtir tur khawpin an ṭha a, Zarkawt FC hian Malsawmfela leh Lalruatfela Zote te khelh fuh ni an tawng a nih chuan mualpho lo tura defensive game an khelh a ṭul ang.

Zarkawt FC lam hian Last 16 lut turin Tanhril FC, Venghnuai FC leh Ramhlun North FC Jr te an hneh a, an match hnuhnung berah chiah harsatna nei loin an chak.

Zarkawt manager Michael Lalchhuanawma chuan, "Chanmari FC hi team ṭha tak an ni tih kan hria. Amaherawhchu tie draw neih zawh khan kan player-te an phur a, an hlau lo. Player-te ber an phur chuan MPL club hi kan barakhaih ve thei a ni," tiin Vanglaini palai a hrilh.

Zarkawt FC hian Aizawl DFA hnuaia Second Division club ni turin Mission Vengthlang FC an lei a, an division awmnaa team ṭha pawl ni turin player chu an in la ṭha ngei a, amaherawhchu MPL team ṭha an bitum dawn - rilru huaisen an mamawh.

SUPPORTER-TE ṬHUTNA TUR

Zarkawt FC - K. Kawla Stand leh S. Malsawmtluanga Stand

Chanmari FC - Zomuanthanga Stand leh Zohminga Zote Stand

Neutral Supporter - Tlang

Zarkawt FC - Last 16 Kalkawng

First Round

Zarkawt FC 4 - 3 Tanhril FC

ZAR : Johny VL Muanpuia 12', 78'; Laltlankima 69'; Zothanmawia 82'

TAN : Johny Lalruatsanga 48'; Lalawmpuia 58'; Lalrinnunga

Second Round

Zarkawt FC 2 - 1 Venghnuai FC

ZAR : Johny VL Muanpuia 22', 45+1'

VEN : Zamthianmang 10'

Third Round

Ramhlun N FC Jr 1 - 4 Zarkawt FC

RAM : Moody Zodingliana 40'

ZAR : Lalmalsawma 23'; HC Marshall 42' (OG); Johny VL Muanpuia 50', 54'