Srikanth tan Olympic a tawp

Nimin tlai khan Rio Olympic mipa badminton quarterfinal khelh a ni a, Indian shuttler Kidambi Srikanth chu world number 1 hlui Lin Dan lakah 21-6, 11-21, 21- 18 in a chak lo.

RioCentro Pavilion-a inkhelah kum 23-a upa Srikanth hi khel ṭha thawkhat viau mah se China star a chet sual duh miau loh avangin atan semifinal luhna kawng a inhawng lo - India mipa shuttler medal lak beiseina a tawp.

Srikanth hian minute 16 chhungin game hmasa ber hloh mah se game hnihnaah erawh hatsatna a nei lo thung. Game hnuhnung berah Srikanth-a'n beiseina a nei sang hman hle a, 11-8 ten hma hruai hman mah se 13-13 a nih hnuah Lin Dan-a'n point hnih a hmuh zawnin Indian tlangval a tho chhuak tawh lo. Srikanth leh Lin Dan te hi ṭum li an intumna a, Hyderabad fa chuam hian 2014 China Masters-ah chiah hnehna a chang.

Semifinal hmasa zawkah seeded pakhatna Lee Chong Wei chuan Chinese Taipei talngval Chou Tien Chen chu minute 41 chhungin 21-9, 21-15 in a hneh bawk. Malaysia shuttler Chong Wei leh world champion vawi nga ni tawh Lin Dan te hi semifinal-ah an inhmachhawn leh ang.