RIO olympic 2016 India-in medal a la ta
Rio Olympic neih mekah ni 11 chhung zet medal la loa awm tawh India tan chanchin lawmawm a thleng. Sakshi Malik chuan hmeichhe wres-tling freestyle 58kg category-ah bronze medal a dawng a, hei hi Brazil-a India-in medal a lak hmasak ber leh awmchhun a la nih rih.
Haryana wrestler hian bronze medal inchuhnaah Ni-lai-ni zan khan Kyrgyzstan wrestler Aisuluu Tynybekova lakah 0-5 ngawtin a hnufual hman; 5-5 a nih hnuah hun tawp hma chiahin Sakshi Kyrgyzstan wrestler lakah point thum a hmuh belh a, 8-5 a hnehna changin India lawmna a thlen.
Kum 23-a upa Sakshi hi India hmeichhe zinga Olympic medal dawng thei palina chiah a ni a, ani hma hian weightlifter Karnam Malleshwari (2000, Sydney), boxer MC Mary Kom (2012, London) leh shuttler Saina Nehwal (2012, London) te chuan medal an lo dawng tawh.
India tihmingṭhatu Sak-shi chuan, "Ka coach, chhungkua, ṭhiante leh min tuipuia min
ṭantute zawng zawng chung-ah lawmthu ka sawi a, tunah chuan mumanga ka lo man
ṭhin kha a takin a thleng dik ta. Ka hun tawn hi a hluin a lawmawm lutuk a, awmdan ka thiam lo," tiin a sawi.
Sakshi chuan inchai chung-chang sawiin, "A hnufual zawka ka ṭan lai pawh khan ka beidawng duh lo, a chhan chu wrestling-ah chuan second rei lote chhungin thil a inthlak danglam vek thei tih ka hriatchian vang a ni. Ṭum danga ka lo tih fo tawh angin a tawpah hnehna ka chang. A chak zawkin chawimawina kan dawng dawn tih ka hria a, medal khan min nghak reng tih ka hriat avangin ka beidawng duh lo," a ti.
Tu nge Sakshi?
September 3, 1992 khan Rohtak, Haryana-ah a lo piang a, a nu leh pa Sudesh leh Sukhbir ten wrestling an tuipui avangin kum 12 mi chauh a nih lai aṭangin Ishwar Dahiya kaihruaina hnuaiah Chotu Ram Stadium-ah training a nei ṭan der tawh.
India hmeichhe wrestler zinga Olympic medal dawng thei hmasa ber ni tura a mah puitu langsar tak pakhat chu a naupan lai aṭanga a mah lo zirtir tawhtu Ishwar Dahiya hi a ni. Infiamna lam a tihtheih viau rual hian zirna lamah pawh a chhuanawm hle, tunah hian Dayanand University, Rohtak-ah MA (physical education) a zir mek.
India beiseina
Kuminah hian Indian Olympic Association chuan Rio Olympic-a inlan tur hian infiammi 118 a tir a, an zinga pariatte chu wrestler an ni. Hmeichhe kal pathum zingah Sakshi Malik a hlawhtling a, Babita Kumari (53kg) leh Vinesh Phogat (48kg) erawhin an tum ram an thleng lo thung.
Tun dinhmunah India hian medal beiseina mipa wrestler pathum an la nei a, Sandeep Tomar (57kg) leh Narsingh Pancham Yadav (74kg) ten August 19-ah inelna an hmachhawn ang a, Yogeshwar Dutt (65kg) chuan August 21-ah inelna a hmachhawn ve leh bawk ang.
Sulhnu chu...
2010 : Kum 18 mi chauh a nih laiin 2010 Junior World Championship 59-kg category-ah bronze medal a dawng.
2014 : Dave Schultz International Wrestling Tournament (60-kg)-ah gold medal dawngin khawvelin a hre ṭan.
July-August 2014 : 2014 Commonwealth Games, Glasgow-a neihah khan silver medal a la leh a, hei hi professional international career bul ṭanna anga ngaih a ni.
September 2014 : World Wrestling Championship, Tashkent-a neihah khan quarterfinal a lut.
May 2015 : Senior Asian Wrestling Championship, Doha-a neihah khan bronze lain Summer Olympics Qualifiers-ah Chinese Lan Zhang hnehin bronze medal a la.
July 2016 : Spanish Grand Prix 60kg inelnaah bronze a la.