Football ngaina khua Tuidam inlan hun Tuidam FC Vs Bethlehem VT FC
Vawiin chhun dar 12:00 hian Lammualah Tuidam an inlan dawn a, in zali chuang hret awmna khua hi Aizawl khaw pawn aṭanga MFA Super Cup Last 16 thleng thei awmchhun an ni. Aizawl District chhunga club awm zat leh Mizoram chhunga khaw awm zat tam dan thlirin Tuidam FC thlen chin hi a chhinchhiahtlak a, MPL club Bethlehem Vengthlang FC an hneh thei a nih chuan tualchhung football history-ah 'Tuidam' hian hmun pawimawh zawk an chang dawn a ni.
Tuidam an ni tlat!
Red Ribbon Football 2012-ah Tuidamin football kaltlangin Mizoramah hming an chher a, sum ṭhahnem tak hmang veng leh khua awm karah semifinal an thleng. Hemi hnu hian MPL vanga tualchhung football hmasawnna chuan India ram thlengin Mizoram hming a tiṭha a, Tuidam lamin an khaw khelmual ṭhat zar zoin Mizoram hmun dang hmasawn rualin hmalam panin ke an pe zel - MFA Super Cup-ah football an ngainatna rah a lang.
Tuidam manager Isaac Malsawmdawngliana chuan, "Kan khelmual hi kan tual chaina ber a ni a, kan naupang thleng hian sport dang kan ti tupui lo - football hi khawtlangin kan tupui an ni. MFA Super Cup a awm dawn tih kan hriat khan hall-ah kan riak khawm nghal a, chhun lamah chuan kan hnahthawh turte thawkin kan hun awl neih a ṭha thei ang berin kan hmang a ni," tiin an thawhrim thu a sawi.
MFA Super Cup-ah an thawhrim rah a lang a, an group awmna fuh lo angin lang mah se Tuidam FC-in Model Veng club Elim FC an hneh hnuah Group E aṭanga Last 16 thleng tura ngaih Aizawl FC Academy an hneh. MPL club hmachhawn turin Tuidam hian inkhelh thiam vanga khaw lar tho Keifang an hneh a, Red Ribbon Football 2012-a Mizoram sawi nghingtu khan kum li hnuah thawm lian tak an rawn nei nawn.
Tuidam manager Isaac chuan, "Kan khua aṭang chauh-in ṭawiawmna ṭha hi kan nei lo a, Mamit District chhunga khaw zawng zawng hian min tuipui a ni. Khawthlang lam khua hi chuan kan khel hi an ngaihven a, TV lamah pawh an en nasa ang. Aizawla awm Hachhek tlangdung mipui te chu kan inkhel en turin Lammualah an in ṭuk khawm ang. MPL club pakhat tal hneh ve theih hi kan duh a, thingtlang leh khawpui danglamna chu fitness a ni. Kan fitness ṭhat hi kan chhuang a, MPL club tan pawh khelh kan har ve khawp ang," tiin an inlungrual ṭhat thu a sawi.
BVT lam
I Day Football-ah Bethle-hem Vengthlang FC-in Zo United lakah point khat an hlawh chhuak a, Group B-a an awm pui dang Shillong Lajong, Dinthar FC leh Ramhlun North FC te an hneh lo vek. Amaherawhchu BVT hi inelna hnuhnung bera an result aṭanga teh chi an ni lo, I League club Lajong an hmachhawn ṭumin chak phu zawk an ni.
BVT coach Lalbiaksanga Colney chuan, "I Day Football aiin kan fitness a ṭha a, team ang pawhin kan ṭha tawh zawk. Tuidam hi Last 16 thleng thei chin an nih avangin an chhe thei lo hrim hrim a, chutirhualin chak tur zawkah erawh kan inngai. Attacking game kan khel ang," tiin chak a inbeisei thu Vanglaini palai a hrilh.
SUPPORTER-TE ṬHUTNA TUR
Tuidam FC - K. Kawla Stand leh S. Malsawmtluanga Stand
Bethlehem VT FC - Zomuanthanga Stand leh Zohminga Zote Stand
Neutral Supporter - Tlang
Tuidam FC - Last 16 Kalkawng
First Round
Elim FC, Model Veng 0 - 3 Tuidam FC
TUI: Lalnunpuia 21'; Hualthansanga 57'; Ramluahkima 90+2'
Second Round
Aizawl FC Academy 0 - 0 Tuidam FC
(Penalty shootout-ah 4-3 in Tuidam FC an chak)
Third Round
Tuidam FC 1 - 1 Keifang FC
(Penalty shootout-ah Tuidam 4-2 in an chak)
TUI: Jerry Lalrinfela 82'
KEI: V Lalthlamuana 8'