Leicester City tan Riyad Mahrez a rinawm

Arsenal-in lakluh tuma an hel lai Riyad Mahrez chuan Emirates Stadium lam pan aiin Leicester City tana rinawm a thlang a, King Power Stadium-ah kum li dang cham chhunzawm turin contract thar a ziak.

Kum 25-a upa winger hi Arsenal bakah Chelsea nen pawh sawizawm a ni a, team hausa leh langsar zawka kal aiin amah chher liantu club-a awm zel a thlang ta zawk. Algeria international hian kar khatah £100,000 a hlawh dawn nia tarlan a ni a, a contract hi a hmang zo a nih chuan Foxes-ah June 2020 thleng a cham ang.

Mahrez hian January 2014 khan French second division club Le Havre
aṭangin Foxes hi a zawm a, season hman zawh takah khan league-ah goal 17 khungin a ṭhiante thun tur vawi 11 a siam sak a, PFA Player of the Year-ah thlan a ni.

Premier League cham--pion Leicester City ma-nager Claudio Ranieri-a'n league nomawi humhim chu an tan thil theih a nih loh thu sawi mah se Foxes-in tih mai mai an tum lo tih tihlan nan an player ṭhate hlawh tam zawk nei turin contract thar an ziahpui zel.

Mahrez hma hian Wes Morgan, Jamie Vardy, Kasper Schmeichel leh Andy King te chuan contract thar an lo ziak tawh a, Italian manager Claudio Ranieri-a'n kum li dang cham chhunzawm turin contract thar a lo ziak tawh bawk.