Spanish Super Cup Barcelona-in nomawi nen bul an tan
Nilaini zan khan Barcelona chuan 3-0 in Sevilla chu Spanish Super Cup second leg-ah an hneh a, khualmualah 2-0 a an lo hneh tawh bawk avangin inkhel pahnih belhkhawmah 5-0 a hnehna changin nomawi nen season bul an ṭan.
Nou Camp-a inkhelah Bar-celona tan Arda Turan chuan goal hnih a khung bakah Lionel Messi chuan goal khat a khung ve bawk a, Sevilla-in an chhanlet theih miau loh avangin a tlawm zawkah an ṭan a ṭul - Barcelona tan kum 2013 hnua Spanish Super Cup nomawi an chawi lehna hmasa ber a ni.
Inkhel chu
Inkhel hmasa zawkah Bar-ce-lona-in 2-0 in hnehna an lo chang tawh a, khualmualah pawh chungnung zawk Catalan club hi Nou Camp-ah pawh chak zawk ni tura beisei an ni. Beisei ang ngeiin Barca-in bul an
ṭan a, ṭan aṭanga minute 10-na lekah Turkey midfielder Turan chuan Messi ball pek umin an hmahruaina goal a khung.
Barca defender thar Samuel Umtiti-a'n penalty area-a a kut hmanga ball a khawih hnuah Sevilla-in thawhlehna remchang an hmu a, mah se Europa League champion team tan Vicente Iborra chuan an penalty hmuh hi chhawr
ṭangkai thei loin Manchester City nena sawizawm hlawh mek Barcelona goalkeeper Claudio Bravo chuan ṭha takin a dan sak.
Second half-ah pawh inkhel a danglam chuang lo. Barcelona bawkin inkhel an thunun a, ṭan aṭanga minute hnihna lekah Turan chuan a goal hnihna awlsam takin a chip lut. Lionel Messi chuan minute 56-naah Lucas Digne ball bek chu Sevilla goal-ah tauh lut ve lehin Barcelona-in 3-0 in hnehna an chang ta a ni.
Enrique a ang
Barcelona-in Spanish Super Cup nomawi an chawi te te a, Catalan club manager Luis Enrique chuan an inelna hmachhawn chu awmze nei lo a nih thu a sawi! Enrique chuan, "Nomawi kan chawi a, a lawmawm. Mahse, season hman zawh takah league leh cup-ah kan champion kawp a nih chuan Super Cup khelh kher hi a ṭulna ka hre lo a, a awmzia ka hre lo," a ti.
Spanish Super Cup-ah La Liga leh Copa del Rey champion an inhmachhawn ṭhin a, season hman zawh takah Barca-in nomawi pahnih an chawi avangin Copa del Rey finalist Sevilla nen an inhmachhawn a, Enrique chuan hei hi a ṭulna a hre lo a ni.
Kum 46-a upa manager chuan sawi chhunzawmin, "Ka tan chuan Super Cup hi a ṭulna a awm lo. Inrinni zanah La Liga-a kan match hmasa ber kan khel tawh dawn a, zaninah nomawi inchuha inkhelh a la ngaih avangin a hautak a ni. Football hi game ropui tak a ni a, kan kal dan ngaia kal reng hi a ṭulna a awm lo," a ti.
Sampaoli a buai
Sevilla coach Jorge Sam-paoli chuan, "First half ṭha tak kan khel a, kan hun neih chhawr ṭangkai thei ni ila chuan goal khung tur kan ni. Barca danglamna chu an hun neih hmasak berah goal an rawn khung nghal kha a ni. Barcelona ang team lian lakah chuan hun neih chhawr ṭangkai loh hi a pawi em em a, i tihsual rualin i tan chhiatna a thleng nghal thei," a ti.
Chile coach hlui pawhin Super Cup khelh a ngaih vanga an buai thu a pha lo. Sampaoli chuan, "UEFA Super Cup-ah Real Madrid kan hmachhawn zo chiah a, Barcelona hmachhawn lehnghal a ngai. La Liga kan match hmasa ber khel turin ni khat chauh inpuahchahna hun kan nei tawh a, player-te kan inenfiah leh phawt a ngai dawn a ni," tiin team ṭha pahnih a zawna an khelh vangin a player-te an chauh thu a sawi.