Boxing official ṭhenkhat chawlhtir an ni

Amateur Inter-national Boxing Asso-ciation (AIBA) chuan Rio Olympic neih mekah boxing official ṭhenkhat chuan thil tih dik lo an neih vangin an hna an thawh chhunzawm an phal sak tawh dawn lo.

Irish bantamweight boxer Michael Conlan chu quarterfinal-ah una-nimous decision hmanga Russian boxer Vla-dimir Nikitin hneh loin a tla a, London 2012 bronze medallist Conlan hian chak zawk tura a inngaih bakah entute hmuh danah pawh Nikitin hi chak lo zawk tura ngaih a ni.

Inhnek zawhah world champion nilai Conlan chuan, "Ka duhthusam chu a tawp ta! Chu pawh dik lo takin. Olympic-ah hian ka inlan leh tawh lo ang a, midang pawh AIBA (Amateur International Boxing Association) hnuaia inelna nei tawh lo turin thurawn ka pe bawk," tiin a sawi chhuak hial.

AIBA official Tom Virgets chuan, "Inzirna tur kan la nei a, inenletna tur leh siamṭhat ngai pawh kan nei. Kan endiktute hi tun hma zawng aia hriam tura kan chher a ṭul bawk. Kha inhneka referee-te leh judge zawng zawngte kha Rio 2016 Olympic Games-ah an inhnamhnawih tawh lo ang," a ti.

Rio Olympic atan bik hian AIBA chuan dan leh hrai a siam danglam a, professional boxer-te an inlan a phal sak bakah ṭum danga an tih
ṭhin lu tuamna (headguard) chu a hlih sak bawk. Endiktu panga awmin point an pek apiang chu computer-in a hlawmin a lo chhiar mai ṭhin a ni. Tun hma chuan judge-ten computer scoring system hmangin an inhnek fuh apiangin an point pek a lo chhiar nghal ṭhin thung a ni.

Bantamweight inelna chauh a ni lo a, heavyweight final-a Russian world champion Evgeny Tishchenko-a'n Kazakhstan boxer Vassiliy Levit chu unanimous decision hmanga a hneh ṭum pawhin mipuiin Tishchenko hi chak lo zawk tur nia an hmuh avangin an lo au el tawh hial bawk.