Champions League khelh tum Celtic an kal zel
Inrinni zan Champions League playoff-ah Celtic chuan 5-2 in an mikhual Ha-poel Beer Sheva an sawp a, Israeli club khelmualah second leg la khel leh dawn mah se goal thum laia hma an hruai tawh avangin Champions League group stage khel turin an dinhmun a ṭha tawh hle.
Inkhel chu
Inkhel ṭantir aṭangin Celtic-in an thunun nghal a, Celtic Park-a inkhelah hian first half chhungin goal thum an khung hman. Scottish club tan hian Tom Rogic chuan inkhel ṭan aṭanga minute 9-na lekah goal hmahruai a khung a, Leigh Griffiths chuan goal hnih dangin a chhunzawm ve lehnghal bawk.
Celtic an inthlahdah hma lutuk hret a, awlsam taka chak mai tura an inngaih tawh hnuah Israeli club-in second half minute 15 chhungin Lucio Maranhao leh Maor Melikson hmangin goal hnih an khung a, away goal hlu tak a nih nghal avangin an phur sawt.
Mahse, Israeli Premier Lea-gue champion team phurna hi Brendan Rodgers-a naute beng harhtu a ni nghal a, Scottish club tan Moussa Dembele leh Scott Brown ten goal khat ve ve khung ve lehin 5-2 in a chungnung zawkah an ṭang ta a ni.
Rodgers a lawm
Celtic boss Brendan Rodgers chuan, "3-2 a nih hnua 5-2 a hnehna kan chan leh theih avangin ka lawm a, ka naute rilru paukhauh leh huaisenzia lantirtu a ni. Kan tan chuan result duhawm tak a ni a, 3-0 a chak kha chu duh zawk ngei mah ila 5-2 a kan chakna khan kan inelna hautakzia min hriattir a ni. Vawiinah hian Champions League khel turin kan la tling lo a, mah se team hmuhnawm tak kan ni," tiin a naute khelh dan chu a fak hle.
Pato a vul zel
Champions League playoff inkhel dangah Villarreal tan a match hmasa berah Alexandre Pato chuan goal khung nghal mah se a team erawh hnehna a chanpui zo lo a, Spanish club hian an mikhual AS Monaco chu 2-1 in an hneh lo. Brazilian striker mimal record erawh a ropui hle - kum 26-a upa striker hian Inter, AC Milan, Corinthians, Chelsea leh Brazil tana a match hmasa berah goal a lo khung vek tawh a ni.
Roma defender thar Tho-mas Vermaelen erawhin a club thar tana a match hmasa berah theihnghilh atana duhawm tak thil a tawng nghal a, Porto nen 1-1 a an inhnehtawkna inkhelah hnawhchhuah a ni. Portuguese club defender Felipe chuan an lama a tihluh hnuah Porto tan striker Andre Silva chuan penalty hmangin an si phurh a sut a, Roma khelmualah an la inhmachhawn leh ang.
Inkhel dangah Bulgarian club ṭha Ludogorets chuan awlsam takin an mikhual Czech Republic club Viktoria Plzen chu 2-0 in an hneh a, Polish club Legia Warsaw chuan an mikhualna ramah League of Ireland champion Dundalk chu 2-0 in an hneh bawk.