Vawi 4 champion zawn thei Icho

Japanese wrestler Kaori Icho chu hmeichhe zinga a zawna Olympic gold medal vawi li la thei hmasa ber a ni. World champion vawi 10 ni tawh Icho hian Nilaini zan khan 58kg freestyle wrestling-ah Russia wrestler Valeria Koblova hnehin Rio Olympic champion a ni.

Kum 32-a upa Icho hian 2004, 2008 leh 2012 Olympic-ah te khan gold a lo dawng tawh a, Olympic ṭum lia gold la vek thei Al Oerter (discus), Carl Lewis (long jump) leh Michael Phelps (200-meter medley) te huangah a hming a chuang ve ta.

Kumin January 13 khan kum 21-a upa Mongolian tleirawl Orkhon Purevdorj lakah kum 13 chhunga a vawi khat nan chak lo ve mah se Rio-ah erawh a
ṭha ber a nih zia a pholang leh chiang hle.

Icho chuan, "Vawiina hnehna ka chan hi ka nu tan ka hlan, ani chuan van aṭangin min thlir tih ka hria a, min lawmpui ve ngei pawh ka ring. Chak lo zawkah ṭang ni ila chuan lungngai takin a awm ve ka ring a, hnehna ka chan avang hian hun hlimawm tak a tawn ve ngei pawh ka beisei," tiin nikuma thi tawh a nu tan a hlawhltinna chu a hlan .