Mizoram Premier League club an chungnung

MFA Super Cup ni hnihnaah Zo United leh Chanmari FC ten an khingpui 1st Bn MAP Football Academy leh Zarkawt FC an hneh a, MPL club pahnih hi quar-terfinal-ah an inhmachhawn ang.

Nimin inkhel hmasa zawkah Zo United tan Jesse Laldinpuia, Malsawma Chhangte leh R. Lalthantluanga (Lalmama) te goal hmangin Aizawl DFA hnuaia first division club Police Academy chu 3-0 in an hneh.

Inkhel hnuhnung zawkah Chanmari FC tan Malsawmfela, Lalruatfela Zote (2) leh Lalrin-chhana te'n goal an khung a; Zarkawt FC-in Johny VL Muanpuia hmangin goal hnihin chhang let mah se MPL club hi 4-2 in an chak.

Zo United leh goal 3

1st Bn MAP Football Academy coach Lalramhluna'n an club hma-chhawn chak ber nena pawh fuh an nih thu a sawi a, khelmualah erawh MPL club hneh tur chuan an la nau hret.

First division club-in defen-der panga nen inkhel bul an ṭan a, an fimkhur tih hmuh hmaih theih a ni lo. Tlar hnung lamah Police Academy an inhnawh tam avangin field laiah Zo United midfielder H. Malsawmtluanga leh Laldin-mawia ten harsatna nei loin ball an sem a, goal khung tur khawp chuan an nawr lo.

Minute 43-naah Police Academy tlar hnung offside trap siam sual zarah Jesse-a'n Zo united goal hmahruai a khung a, first half-a goal awmchhun a ni.

Second half-ah Police Academy defender Lalhun-liana'n Zo United goal nawr tur dan chah nan a kutin ball a beng a, yellow card vawi hnihna hmuin minute 68-naah hnawhchhuah a ni.

Player 10-a khel lakah MPL club an chungnung a, amah-erawhchu Zo United hian an goal hnihna khung turin penalty an mamawh - captain Malsawma'n minute 85-naah a khung. Minute thum hnuah goal mawi bik a lut zui - Zo United wing back Lalmama'n ding lam aṭanga Jesse-a pass chu a ke vei lamin goal kilah a tak a pet lut.

Zo United tan goal thum khung hi result ṭha a ni a, amah-erawhchu injury time-ah captain Malsawma'n chet mawi loh vangin yellow card vawi hnihna a hmuh avangin inkhel tawp danah erawh an lungawi lo ang. Captain Malsawma'n Chan-mari FC a hmachhawn thei dawn lo.

Police Academy coach Lal-ram-hluna chuan, "MPL club an nih vangin kan zah lutuk a, tlar hnung lama player kan dah tam lutuk kan tuar a ni. Kan player-te khelh danah ka lawm a, kan chak loh chhan erawh ka tihsual a ni," tiin defensive game-a an khel chu an chak loh chhan a nih thu a sawi.

Zo United coach Vanlalrova chuan, "Ka player-te'n an zuam mah mah deuh a ni. Kan khelh danah ka lawm loa, kan result-ah erawh ka lawm. Referee thultukna hriattiam har ka ti a, kan defender-in red card a hmuh chuan a tisual hmasatu Police Academy player kha hnawh-chhuah ve tur a ni," tiin a lungawi loh thu Vanglaini palai a hrilh.

Ngai awh lo Chanmari

Chanmari FC-in quarterfinal an lut a, an veng ṭhenawm Zar-kawt FC chu chak lo zawk ni mah se fak phu zawk an ni.

Lalsangzuala Hmar naute hian I Day Football semifinal-a Ramhlun North FC an hneh loh hnuah inrintawkna an la nei let lo tih a chiang a, goal ruk luhna inkhelah hian Chanmari FC hi ngaihngamin an awm lo.

MPL club-in inkhel bul an
ṭan ṭha a, chance ṭha ṭum thum vel an hlah hnuah Sawmfela'n goal hmahruai a tauh lut a, minute 79 khelh tur a la awm avangin goal tam zawk a lut dawn tih chiang.

Chanmari FC-in goal hnihna an khung mai thei lo a, Fela Zote hmanga minute 32-naa goal an khung hnuah pawh an tlar hnung a la nghing reng.

Khelmuala inlan zingah Zar-kawt FC forward Johny VL Muanpuia a langsar ber. Lunglei tlangval hian last 16 kalkawnga Tanhril FC, Venghnuai FC leh Ramhlun North Jr FC te an hneh ṭumin goal hnih a khung vek a, MPL club Chanmari FC lamah pawh goal hnih tho a khung.

Johny hian Chanmari FC tlar hnung vawi tam a chhaih buai a, MPL club-in Lalrinchhana leh Fela Zote te hmanga goal an khung belh hnuah pawh nuam sain an awm lo.

Zarkawt FC-in hnehna chang lo mah se an khelh danin Chanmari ṭantute a barakhaih a, team ṭha zawka ngaih MPL club ṭantuten goal lina an khungin chakna goal khunga an lawm ang maiin an thawm a ring. Hei hian inkhel chanchin a sawifiah chiang hle a, hun tawp thlengin Zarkawt ṭantuten beisei an nei bawk.

Chanmari FC manager C. Lalthanmawia chuan, "In-rintawkna kan la tlachham deuh a ni. Tihsual neuh neuh kan la ngah avangin awlsam taka chak thei turah harsa takin kan chak. Amaherawhchu tunah chuan kan chak leh ta a, Zo United kan hmachhawn hunah chuan tun aia ṭha zawkin kan khel thei tawh ang," tiin Vanglaini palai a hrilh.

Zarkawt FC coach James Lal-nunsanga chuan, "Goal chance chu an ngah tehmeuh a, amaherawhchu an goal khung tam zawk kha kan tihsual vang a ni. Chak thei dinhmunah kan ding a, kan player-te'n an rilru taka an ngam lohna kha kan chak lohna chhan a ni," tiin inkhel chungchang a sawi.