I Day Football champion hmaah III Div club Bungkawn FC

Bungkawn FC-in MFA Super Cup Last 16-ah Mizo club zinga I League khel hmasa ber Aizawl FC an hmachhawn dawn a, Aizawl DFA hnuaia third division club hian I day Football hnuhnung bera champion hi an hlau lo.

Vawiin tlai dar 2:30-a Lammual inkhel tur chungchang sawiin Bungkawn FC coach Samuel Lalrinngheta chuan, "Aizawl FC chauh ni loin Mizoram mipui barakhaih kan tum. MFA Super Cup-a kan tel dawn khan champion tum law lawin inpuahchah ang u kan tia, kan thawkrim khawp mai," tiin chak a inbeisei thu Vanglaini palai a hrilh.

Bungkawn FC-in champion an tum bakah Aizawl FC hneh an tum thu sawi mah se K. Malsawmkima a zam phah lo. I Day Football-a kum hnih a zawna AFC champion puitu coach Mala chuan, "Pathian zarah inelna hrang hrangah kan champion ve tawh a, MFA Super Cup nomawi hi kan la chawi loh avangin champion hi kan duh a ni. Kan match hmasa berah hian Albert Zohmingmawia, Lalruatthara leh Ricky Lallawmawma te an awl ang a, I Day Football la inlan tam lote tan khelhna hun ka siam ang," tiin a khingpuite inhrosakna chu eng thamah a ruat lo.

Third Division club hian MPL club Zo United tana khel tawh Joseph Biakthianghlima leh David Lalthla-muana te an kawl a, last 16 thleng turin Lungverh FC, Raphael FC leh Rempuia Memorial FC te an hneh. Bungkawn FC hi an chak chhoh dan thlirin tun hnaia Mizo club zinga ṭha ber (?) Aizawl FC hneh turin an ṭha tawk lo.

Aizawl FC hian player ṭha ṭhenkhat awltir mah se I Day Football-a la inlan lo zingah Lalnuntluanga te an la awm. Bawngkawn tlangval hi Chandigarh Football Academy chhuak a ni a, Aizawl FC rinrawl ṭhin niin season liam taa Zo United rinrawl a ni. Heta ṭanga chhut pawh hian I Day Football champion hi an khel fuh lo a nih pawhin an chak a rinawm a; Bungkawn FC hian hnehna an chang a nih chuan MFA Super Cup-a result sawi hlawh ber a ni hial ang.