Argentina lakah US an chungnung

Nilaini zan khan Rio Olympic mipa besketball quarterfinal khelh a ni a, champion lai United States chuan Argentina lakah 105-78 a hnehna changin semifinal an lut. Australia, Serbia leh Spain te pawhin quarterfinal an paltlang ve bawk.

US tan Kevin Durant a thawhhlawk leh ber a, point 27 score-in Argentina chhaih mang-angtu a ni. Ani bakah hian Paul George (17), DeMarcus Cousins (15) leh Kyrie Irving (11) te an langsar hle. US hian Olympic hnuhnung pahnihah gold lain tunah hian infiamna khawmpui lianah hian match 23 chung zet hneh loh nei loin an kaltluang tawh - final lut tur chuan Spain an paltlang leh a ngai ang.

Spain hian an league match hmasa pahnihah Croatia leh Brazil te hneh lo mah se a zawnin match li hnehna an chang zawn leh tawh a, quarterfinal-ah France chu 92-67 in an hneh. Spain team-ah hian NBA champion ni tawh Pau Gasol bakah Chicago Bulls forward Nikola Mirotic leh Minnesota Timberwolves point guard Ricky Rubio te an awm avangin team ṭha an ni.

US leh Spain te hian London 2012-ah khan gold medal an lo inchuh tawh bawk a, hemi ṭhum hian US-in 107-100 in hnehna an chang a, tun ṭumah hian inlehthalna kan hmu a nih pawhin a mak lo ang.

Quarterfinal dangah Australia chuan 90-64 in Lithuania an sawp a; Serbia chuan Croatia lakah 86-83 in hnehna an chang ve bawk. Australia leh Serbia te hi final lut zawk nih inchuhin an inhmachhawn leh dawn a ni.