Saints hmachhawn turin Pogba a inpeih

Zanin dar 12:30 hian Manchester United-in Southampton an mikhual dawn a, khawvela player manto ber ni tura pound maktaduai 89-a Red Devils zawmtu Paul Pogba chuan Saints hmachhawn tura a inpeih thu a sawi.

Juventus midfielder hlui hian Jose Mourinho hnuaia United match hmasa berah Italian Cup-a hremna a lo tawrh tawh chu a la chhawm zel avangin a inlan thei lo a, Bournemouth laka awlsam taka 3-1 a an hnehna inkhelah a tel loh erawh khelmualah a lang lo.

France international chuan, "Ka khelh dawn leh dawn loh hre tur chuan manager zawh a ngai ang. Keima lamah chuan harsatna ka nei lo a, ni 10 chhung training nei tawhin ka in fit em em a ni," a ti a, Saints hmachhawn turin a inpeih tawh hle.

Kum 23 leka upa nichungin khawvel player manto ber a ni a, mah se Pogba chuan a man vanga buaina a neih loh thu a sawi. French midfielder chuan, "Ka man chungchang hi ka ngaihtuah ngai lo a, football khelh hi ka duh ber chu a ni mai. Khawvela a ṭha ber leh thiam ber nih hi ka duh leh tum chu a ni. Champions League hi kan awmna tur a ni a, chutiang tak tur chuan theihtawp kan chhuah ang," tiin United chuan hmasawn zel an tum thu a sawi.

Jose Mourinho-a tan Old Traf­ford-a competitive match khel tura United a kaihhruaina hmasa ber tur a ni dawn a, a pawimawh lehzual dawn. United midfielder Juan Mata chuan, "Tun season atan Old Trafford-a kan official match hmasa ber tur a nih avangin kan tana a pawimawh zia hi sawifiah kher a ngai lo. Inkhel hmuhnawm tak phochhuaha fan-te hmela nui hmel hmuh kan duh a ni," tiin tih mai mai an tum lo.

Southampton-in Everton laka an boss Ronald Koeman an chan hnuah Claude Puel an ruai a, kum 54-a upa manager hian Saints a enkawl tirhin khawvela league hautak ber luhchilh dawn mah se hlauhthawnna a neih loh thu a sawi - zaninah Jose Mourinho-a naute hmaah a zam leh zam loh a hriat dawn.

Puel hian a match hmasa berah Southampton hi Watford lakah point khat a hlawhchhuahpui thei hram a, Koeman-a'n Old Trafford-a match hnuhnung pahnihah Saints a chakpui ve ve avangin Dutch manager sulhnu ropui hi chhunzawm ve a tum ang.

Manchester United tan Com­munity Shield an khelh ṭuma inhliam Jesse Lingard a dam leh tawh a, hrem vanga match hmasa ber khel thei lo Chris Smalling-a hremna a zo tawh bawk. Mourinho-a'n a duh chuan player pahnih hi a chhawr thei tawh dawn.

Saints lamin khup hliam vangin an defender pawimawh Ryan Bertrand an chhawr thei dawn lo a, nipui bazar-a an lakluh Nathan Redmond, Pierre-Emile Hojbjerg leh Jeremy Pied ten United an hmachhawn thei thung ang.

Manchester United tan striker thar Zlatan Ibrahimovic-a'n a Premier League match hmasa berah goal 'ṭha bik' a khung a, Old Trafford-a a competitive match hmasa berah goal a khung leh thei dawn em? tih chu zawhna a ni - chhanin a awm thuai dawn.