Hun ṭha kan bawhpelh - Emery

Aston Villa manager Unai Emery chuan AS Monaco an hneh lo chu a ui hle - Champions League khelh laiah a sang zual pariat zinga tel theihna remchang ṭha chu an bawhpelh nia a ngaih thu a sawi.

Monaco khemual Stade Louis II-ah Villa hi an lenglut a, minute riatna lekah Ligue 1 club tan Wilfried Singo chuan goal khungin 1-0 in an chak a, English team an mikhual hnuhnung pangaah vawi li an chak.

Villa hian goal khung theihna remchang chu an insiam nual, mahse Leon Bailey, Emiliano Buendia leh Ollie Watkins te an chefuh thei lo, goalkeeper Radoslaw Majecki a che ṭha takzet bawk a ni.

Emery naute hian match sarih an khelh aṭangin point 13 an hmu a, table-ah pariatna dinhmun chu an la luah tho, mahse an elpui club dang an chak a nih chuan khelh zat inangah a sang zual pariat zingah an tel dawn lo.

Aston Villa manager Emery chuan, "Inkhel pawimawh takah kan chak lo, ka hmun dan chuan a sang zual pariat zinga tel theihna remchang ṭha tak chu kan bawhpelh.

"Hun tawp lamah phei kha chuan striker pahnih kan hmang, kan khingpui an khelh ṭhat rualin keimahni lam kan hriam tawk lo," a ti. Premier League club hian Villa Park-ah Celtic an la mikhual leh ang.