UCL playoff khel tur chiang Atalanta

Atalanta chuan Champions League playoff an khel phak ngei dawn tih a chiang ta - Thawhlehni zan khan Italian club hian Sturm Graz chu 5-0 a sawp chungin an dinhmun hi an ti chiang.

Gewiss Stadium-a inkhelah Atalanta tan hian player panga - Mateo Retegui, Mario Pasalic, Charles De Ketelaere, Ademola Lookman leh Marco Brescianni ten goal khat ṭheuh an khung.

Tun season Champions League khel team 36 zingah Atalanta hi palina an ni mek, match sarih aṭangin point 14 an hmu; a sang zual pariatte chuan last 16 an lut tlang nghal dawn a, pakuana aṭanga 24-na ten playoff an khel ang.

An khelh hmabakah chak lo pawh ni se Atalanta hi 24-na aia hniamah an awm dawn lo, hei vang hian a hniam berah playoff chu an khel phak ngei ngei tawh dawn tihna a ni.

Atalanta coach Gian Piero Gasperini chuan, "Hetiang taka maia Champions League kan khel ṭha hi a lawmawm, chutihrualin kan ram tam tak chu kan la thleng lo tih kan hriat a ṭha ang.

"Sturm Graz kha team ṭha, anmahni ram league thunun theitu an ni a, an laka goal nga khung chu thil lawmawm tak a ni. UCL chauh ni loin tunah chuan Serie A lama result ṭha neih zui kan tum dawn a ni," a ti.

Chak lo Sturm Graz erawh khelh hmabak pakhat la nei mah se playoff an khel phak dawn tawh lo tih a chiang ve bawk - Austrian ramah thlasik chawlh an hman zawhna a la rei lo, kar ruk chhung an chawlh hnua an match khelh lehna hmasa ber niin an lo kir lehnaah an che fuh lo hle.