Keys hmachhawn tur Swiatek
Iga Swiatek chuan a khingpui Emma Navarro lakah harsatna lian tham a tawk lo, nimin Australian Open quarterfinal inkhelah game thum chauh hloh chungin 6-1, 6-2 in a hneh.
Rod Laver Arena-ah Swiatek hi a tir aṭangin a khel ṭha hle, darkar khat leh minute 29 chhung lekin seeded pariatna Navarro in a hneh thei. Grand Slam title pali a neih tawh chu Melbourne Park-ah hian belhchhah ngei a tum ang.
Australian Open 2025 match vawi nga a khelh tawhah Swiatek hian game 14 chiah a la hloh, a hmachhawn apiang harsa vak loin a hneh zel thei tihna a ni, a hmabak a ding tur Madison Keys tan hna a hautak dawn hle.
A match hmasa pali nena khaikhin chuan tun ṭum hi hun a hman rei ber a ni zawk hial, fourth round an khelh ṭum phei chuan minute 59 chhung lekin hnehna a chang thei, inelna tawp lamah thahrui a la ngah dawn.
Kum 23 mi Swiatek chuan, "Semifinal hi ka tawpna a nih loh ka beisei, a chhan chu a sang ber thlen tumin Australia ram ka pan," a ti, season hmasa khan khelmual pawn lamah harsana nei mah se, tunah chuan buaina nei loin a inkhel thei leh tawh.
Swiatek hian semifinal-a a khingpui tur Keys hi tun hmain vawi nga an inkhelh tawhah ṭum li a hneh, tun ṭumah pawh hian inrintawkna sang tak nen a hmachhawn thei dawn, player pahnih hi tun hma lama Australian Open final la lut ngai lo an ni.
Quarterfinal inkhel dangah Keys hian Elina Svitolina chu 3-6, 6-3, 6-4 in a hneh ve thung. Adelaide Open title laltu Keys hi tun hnaiah a zawnin match 10 chhung a chak zawn ta a, a khelh ṭhat vanglai tak a nih avangin hmachhawn a awlsam lo ang.
Semifinal thlir lawkin Swiatek chuan, "Madison Keys hi player danglam tak mai a ni a, tun hmain che thei miah loin min siam tawh. Chuvangin a khelh fuh ni chuan dan a harsa hle, fing leh fimkhur taka ka chet a ngai dawn a ni," tiin a sawi.
Vawiin chawhnu lam hian hmeichhe semifinal hi khelh chhunzawm leh nghal a ni dawn, world number 1 leh champion lai ni bawk Aryna Sabalenka leh Paula Badosa te chu dar 2:00-ah an inkhel ang a, chumi hnuah Swiatek leh Keys an inhmachhawn zui ve leh ang.