Gokulam khingpui tur Inter Kashi

I League-ah Gokulam Kerala-in zanin dar 7:00 hian Inter Kashi an mikhual dawn. Inkhel hi Ten Sports 2-ah a en thei dawn a, online hmanga en duh tan SSEN app-ah a en theih bawk ang.

Inter Kashi hian Indian Super League khelh ngei tumin sum an seng tam a, an beisei ang ngawtin I League a awlsam lo thung. ISL nomawi chawi tawh coach Antonio López Habas kaihhruaina hnuaiah Inter Kashi pahnihnaah an awm mek a, palinaa awm Gokulam hi an elpui tur zinga mi a ni.

Kerala club Gokulam pawh hi an insiamrem thei bik lo a, Delhi FC (5-0) leh Dempo SC (1-0) te an hneh zawh hnuah Namdhari 2-0 in an hneh lo. Inter Kashi-ah hian Edmund Lalrindika a tel a, Gokulam-ah hian Ramdinthara (Tharpuia) a tel thung.