Spurs talbuai hmaah Hoffenheim

Tottenham Hotspur-in nikum December 20-a Manchester United an hneh hnuah chetfuh an nei meuh lo a, an result a ṭhat loh avangin Ange Postecoglou dinhmun a derthawng hial. Zanin dar 11:15 hian Spurs-in Hoffenheim an hmachhawn dawn a, team boruak tih ṭhat nan chak an mamawh hle.

Postecoglou hote hian Premier League match hnuhnung pangaah chak hmel an hmu tawh lo a, match hnuhnung pathumah Newcaslte (1-2), Arsenal (1-2) leh Everton (2-3) te an hneh lo. Spurs hi tun hnaia an result chhiat avangin league table-ah pawh 15-naah an awm hial.

Chutihrualin Europa League-ah erawh knockout stage lut turin an dinhmun a ṭha a, last 16 lut nghal tur erawh chuan Hoffenheim an hneh a ṭul thung. Spurs hian German club an hmachhawn hnuhnung parukah vawi khat chiah an chak a, ṭum li ngawt an chak lo.

Mahse, Hoffenheim hian English club lakah result ṭha an nei bik lo a, ṭum li an hmachhawn tawhah an chak lo vek. Kartawp khan Hoffenheim hian Holstein Kiel chu 3-1 in an hneh a, hei hian inrintawkna a pek phah ngei ang.