Match hautak khel turin ka inbuatsaih - Zverev

Alexander Zverev-a'n a vawi khat nan Grand Slam champion nih a tum, a kalkawngah Novak Djokovic a lo ding dawn - vawiin chawhma dar 9:00 hian Australian Open final lut tur zawk chinfel a ni ang.

Seeded pahnihna Zverev chuan, "Inkhel hautak leh harsa tak hmachhawn turin rilru leh taksa ka inbuatsaih, a hautak dawn a ni satliah lo a, tennis match class sang tak hmachhawn tur pawin inpeih a ngai bawk.

"Novak hi mahni inveng thiam, a hunah chuan khingpuite nawr na thei tak a ni, chuvangin player hmachhawn harsa berte zinga mi a ni a, ka theihna zawng zawng ka hlan a ngai ang," a ti.

Player pahnihte hi tun hmain ṭum 12 an inhmachhawn tawh, chung zinga pariatah chuan Djokovic a chak; ṭum li dang hnehna changtu Zverev tan pawh kawng a inhawng ve tho niin a lang.

Zverev hi kum 27 mi a ni tawh - a thiam zual pariat inelna ATP Finals leh Olympic gold medal meuh pawh a la tawh, mahse Grand Slam nomawi a la chawi lo, tun hi atana hun ṭha tak a ni a, bawhpelh loh hram a tum dawn a ni.

Djokovic hneh erawh thil harsa a ni dawn. Serbian star hian Melbourne Park-ah chauh pawh hian major title 10 a la tling tawh, midang chunga leng a ni. Chutihrualin tun hnaiah a tlahniam ve ta deuh a, rinkai zawk ni mah se a chiang bik lo.