Odisha chakpuitu Jerry Mawia

Jerry Mawihming-thanga'n goal a khung leh ta - Nilaini zan khan Indian Super League inkhelah Odisha FC a chakpui a, an khungpui Bengaluru chu 3-2 a hnehin, playoff khelh beiseina an chhi nung zel.

Bengaluru khawpuia inkhelah mualneitu club-in minute 13 chhungin goal hnih an khung a, Edgar Mendez leh chuai thei lo Sunil Chhetri ten an khung - mahse, Odisha hian chhanglet turin hun an mamawh rei lo.

Brazilian forward Diego Mauricio chuan first half chhungin si phurh a sut zo a, penalty ve ve a ni - minute 26-naah Australian defender Aleksandar Jovanovic chuan Mauricio a titlu a, red card a hmuh bakah penalty a chawi tel.

Flamengo striker hlui Mauricio hian goal-ah a chantir. Minute 38-naah Roshan Singh chuan penalty box-ah a kuta ball tawk fuhin, penalty a chawi leh a, Mauricio bawk pen chhuakin, goal-ah a chantir.

Minute 50-naah Jerry-a hun a thleng a, Hugo Boumous siamsak chu harsatna nei loin goal-ah a khung a, a team a chakpui. Chanmari tlangval hian tun season-ah ISL match 16 a khelhah goal nga a khungna chiah a ni a, assist vawi khat a nei tel.

Nilaini zan inkhelah Odisha tan Jerry Mawia bakah Jerry Lalrinzuala leh K. Lalṭhathanga (Puitea) ten inkhel bul an ṭan a, Bengaluru tan midfielder ṭhangduang Lalremtluanga Fanai chuan inkhel bul a ṭan bawk.