Manchester City an inthuam ṭha; Khusanov leh Reis zawhah Marmoush an la lut

Premier League champion lai Manchester City-in thlasik bazarah player man to pathum ngawt an la lut. Defender pahnih Abdukodir Khusanov leh Vitor Reis te an lakluh hnuin nimin khan Omar Marmoush an lakluh thu an puang.

City hian Marmoush hi euro maktaduai 75 (£64m) in Eintrach Frankfurt aṭangin an la lut a, Egyptian forward hian kum li leh a chanve chhung atan contract ziakin June 2029 thleng daih a ni.

Tu nge Marmoush?

Omar Marmoush hi kum 25 mi a ni a, Egypt international hi tlarhma position hrang hrang wing leh no. 10-ah te chhawr theih a ni a, Frankfurt-in centre forward-ah an chhawr ber.

Marmoush hian an ram club Wadi Degla aṭangin bul a ṭan a, German club VfL Wolfsburg zawmin FC St. Pauli leh VfB Stuttgart-ah te loan hmangin a khel tawh bawk. Wolfsburg aṭangin kum 2023 khan free tranfer-in Eintracht Frankfurt a zawm a, helai hmun hi hming a chher tak takna a ni.

Season liam ta khan Frankfurt tan league match 29 aṭangin goal 12 a khung a, inelna hrang hrangah goal 17 a khung. Tun season-ah erawh season chanve chhung lek a khel chungin Bundesliga-ah goal 12 a khung der tawh a, inelna hrang hrangah goal 20 a khung der tawh.

Marmoush hian Egypt tan pawh match 35 khel tawhin goal ruk a khung tawh a, African Cup of Nations-ah vawi hnih khel tawhin kum 2022 khan final a thlenpui.

Beisei a sang

Man City director of football Txiki Begiristain chu Marmoush an lak theih avangin a lawm hle. Premier League champion lai hian ṭum dang angin tun season-ah goal an khung thei tawk lo a, Erling Haaland 'nil' ṭumah team angin an 'nil' fo.

Begiristain chuan, "Omar hi forward hmuhnawm a ni a, a puitling tawh bawk. Kan club a rawn zawm thei hi ka lawm hle. A inkhel kan en apiangin inkhela danglamna thlentu a ni a, season ṭha bik a hmang a ni.

"Attacker ṭhain an neih tur ang chu a nei vek a, a tlan chak bakah a rilru a fim a, goal hmaah a hriam bawk. Position hrang hranga a khel thei hi kan tan chuan a hlu hle. Pep-a hnuaia ṭha takin a khelh theih ngei ka ring a, hma a sawn zel turah ka ngai bawk," tiin a sawi.

Marmoush hian season khat leh a chanve chhungin Bundesliga-ah goal 27 a khung a, assist vawi 15 a nei bawk. Theihna sang tak a neih avangin 'Egyptian King' thar tia sawitu pawh an awm a, mah se Premier League-ah chuan 'Egyptian King' dik tak Mohamed Salah-a'n ro a rel mek tih hriat a ṭha.

Sum an seng ta

Champions League-ah Manchester City an talbuai a, Premier League-ah pawh a danglam chuang lo. Pep Guardiola hote hian league match 22 aṭangin point 38 chiah an hmu a, pangaanaah an awm mek.

City-in goal 44 an khung a, Liverpool goal rukin an tluk lo. Marmoush awm hnuah City goal bawh a na sawt turah a ngaih theih. Pep-a hote hian goal 29 an chhuah a, an chunga awm te mai ni lo - an hnuaia awm Newcaslte United (26) leh Bournemouth (26) ai pawhin goal an chhuah tam zawk.

Hei vang tak hian City-in Lens aṭangin Abdukodir Khusanov chu pound maktaduai 33.9-in an la lut a, Palmeiras aṭangin Vitor Reis chu pound maktaduai 29.4 in an la lut bawk.

Tun thlasik bazarah City-in pound maktaduai 127.2 lai an seng ta a, nipui bazara an sum sen zat pound maktaduai 23 nen chuan a inthlau ta hle. Chutihrualin City hian nipui bazarah khan player hralhna aṭangin pound maktaduai 158.85 an la lut tih hriat a ṭha.

Engtin zel?

Man City-in kartawp hian Premier League-ah Chelsea an hmachhawn nghal dawn a, hmabak a hautak nghal dawn. Player tharte an inlan dawn em, tih a la chiang lo a, chutihrualin City-in insiamṭhat an mamawh tih erawh a chiang.

City hian tlarhmaah Savinho, Phil Foden, Jeremy Doku, Jack Grealish leh Kevin De Bruyne te an nei sa a, hengte hi Marmoush-a elpui turte chu an ni a, a awlsam dawn lo.

Marmoush hian City number 7 a ha dawn a, he number hi tun hnaiah chuan João Cancelo, Raheem Sterling, James Milner, Stephen Ireland leh Robbie Fowler ten an ha tawh. Egyptian forward hi City number 7 ha tawh zinga ṭha ber a ni em, tih chu hunin a la hril ang.