Goal nga khungtu Real Madrid

Real Madrid boruak a 'fuh' leh tawh - kumtirah Spanish Super Cup final-ah chak lo mah se, La Liga table chung ber an luah leh tawh a, Champions League lamah pawh goal nga ngawt an khung.

Real hian Nilaini zan khan UCL match-ah Red Bull Salzburg an mikhual a, 5-1 in an sawp. Real tan Rodrygo leh Vinícius Júnior ten goal hnih ve ve an khung a, Kylian Mbappe chuan goal khat a thawh bawk.

Salzburg tan Mads Bidstrup chuan mualpho zualpui khuhna goal a khung ve a, UCL match khat khelh tur la nei mah se an tla chiang tawh - Real erawhin top 8 beiseina an la nei a, an tel ta lo a nih pawhin playoff chu an khel ngei dawn tih a chiang.

Rodrygo fak hun

Real Madrid ṭhatzia sawi apiangin Vinicius Jr., Jude Bellingham leh Mbappe ten tlarhma an luah ṭhin a, Rodrygo-a'n khel ṭha ve reng chungin lam a hlawh tawk lo - Brazilian forward hian Nilaini zanah amah theihnghilhtute a hming a hriattir ve leh ta.

Salzburg lakah Rodrygo hian goal hnih a khung a, a goal khung pahnih hi first half-a a khung ve ve a ni. Minute 23-naah Rodrygo hian goal hmahruai a khung a, minute 34-naah a belhchhah bawk.

Kum 24 mi forward goal khung hi Bellingham siamsak ve ve a ni a, tun season inelna hrang hranga goal 10 a khungna chiah a ni a, assist vawi ruk a nei bawk - match 26 a khel tawh.

Goal a sur

Real-in first half-ah goal hnih an khung a, second half-ah an insum phah lo - inkhel ṭan aṭanga minute thumna lekah Mbappe a inlar a, French striker hian Salzburg keeper Janis Blaswich tihsual nangchingin an goal thumna a khung.

Mbappe hian December thleng khan sawisel hlawh viau mah se, inelna hrang hrangah match 30 khelin goal 18 a khungna chiah a ni a, assist vawi thum a nei bawk - beisei phak lo anga la sawi reng chu a chi tawh loh!

Hei hi Real tawpna a la ni lo - Vinicius chuan goal hnih khung ve lehin, a team tan point thum a nem nghet a, Brazilian forward pawh hian tun season-a match 26-a khelhah goal 16 khunga assist vawi 10 neiin, Real tan hian goal 101 ngawt a khung ta.

Real thawhlehna

Madrid-in goal nga an khung hnuah Bidstrup chuan goal khat a khung ve a, Real tan buaina tham a tling lo - Salzburg hian an ram league lamah chuan Masi chawlh an la hmang mek a, December 14-a an chawl tawh kha February-ah an inkhel leh chauh ang.

Real-in nuamsain hnehna an chang a, an inrintawk zel nan Austrian club laka an result hi a pawimawh - an match tawp berah January 29, Nilaini zanah Brest an lenchilh dawn a, direct-a last 16 luh chance an la nei.

Carlo Ancelotti naute hian tun season UCL-ah Lille (1-0), AC Milan (3-1) leh Liverpool (2-0) an ngam lo tawh a, match hnih a zawna chaka insiamṭhain, dinhmun duhawmah an inhlangkai leh ta.