Kan fimkhur a ngai - Slot

Liverpool chuan zanin dar 8:30 hian league match khel turin Ipswich Town an mikhual dawn a, Reds manager Arne Slot chuan hnehna chan chhunzawm zel turin an fimkhur a ṭul thu a sawi.

Slot chuan, "A chang chuan kan game hi a muang hretin a lang ṭhin a, fans tan chuan en a hahthlak ṭhin mai thei. Ka pa pawh football ngainatu a ni a, Lille nena kan inkhelh zawh khan min rawn biain, a beisei anga a hmuhnawm loh thu min hrilh!

"Mahse, a chang chuan nawr nat kan tum luatah kan chesual thei a, kan chak loh phah thei a ni, tiin ka hrilh. Lille nena kan khelh danah khan ka lawm a, mahse, a chang chuan counter attack-a ball hloh chang kan nei a, khatiang khan Forest lakah kan tipalh tawh bawk," a ti a, fimkhur a ṭul thu a sawi.

Slot chuan sawizawmin, "A bik takin tlarhnung ringawt an ven chuan a harsa ve ṭhin a, chumi chinfel dan chu kan ngaihtuah a ngai," a ti a, inkhela goal khung hma ṭhin tura an ṭan a ngaih thu a sawi.

Dutch coach hian 2-1 a Lille an hneh ṭuma inhliam Curtis Jones dinhmun a la chian loh thu a sawi a, zaninah chuan a inkhel thei lo chiang ang.

Reds hian Champions League last 16 an lut tawh a, Premier League table chung ber an luah bawk. Pahnihna Arsenal aiin point rukin an sang zawk a, match khatin an khel tlem bawk - Nilaini zan dar 1:30-ah PSV Eindhoven chu UCL match khel turin an lenchilh zui dawn.