Molineux-ah Man City chak awlsam

Manchester City-in Thawhṭanni zan khan tun season atana an match hmasa ber an khel a, harsatna nei loin Molineux-ah Wolverhampton Wanderers 3-1 in an hneh. 

Pep Guardiola hote hian coronavirus positive vanga Riyad Mahrez, Aymeric Laporte leh Ilkay Gundogan te an chhawr thei lo chungin Premier League club ṭha zinga mi Wolves awlsam taka an hneh avangin Premier League champion rinkai tiin an chhal theih ang. 

Man City tan hian Kevin de Bruyne, Phil Foden leh Gabriel Jesus ten goal khat ṭheuh an khung a, Wolves goal khat hi Raul Jimenez-a khung a ni. Pep-a hote hi September 24, Ningani zan hian Bournemouth nen League Cup-ah an inkhel ang a, September 27, Pathianni zanah Leicester City an hmachhawn zui ang.

Man City tan pound maktaduai 40 man defender thar Nathan Ake-a'n bul a ṭan nghal a, John Stones nen an inkawp. England tana a fehchhuahnaah Foden mualpho mah se City tan bul a ṭan nghal a, player thar Ferran Torres erawh bench-ah a awm thung.

Covid-19 vangin player pawimawh pathum chhawr thei lo mah se Belgian midfielder Kevin De Bruyne a awm miau avangin Man City tan lungngaihna tur a awm lo. Molineux-ah pawh ṭan phat aṭangin Pep-a hote an chungnung nghal hle. 

Wolves tlarhnung tan Raheem Sterling a hnawksak nghal a, English forward hian Conor Coady lakah penalty a hlawh chhuak nghal teuh hle. De Bruyne, Sterling, Jesus leh Foden te an hmuhnawm a, Man City inkhel a nung ṭha hle.

Minute 19-naah KDB-a'n a thiamna pholangin Wolves defender Romain Saiss lakah penalty a hlawh a, minute 20-naah Belgian midfielder hian goal-ah a chantir nghal bawk. Minute 32-naah Sterling-a pass chu Foden-a'n a pet goal a, team angin Man City an khel ṭha a, English rawlthar Foden hi a langsar zinga mi a ni.

First half tawp hmain KDB-a'n goal khung belhna hun ṭha a nei a, keeper Rui Patricio chauh a hmachhawn hnuah a pet goal lo. Man City-in first half an thunun a, an khingpui Wolves an nih bawk avangin a naute khelh danah Pep Guardiola pawh a lawm khawp ang.

Wolverhampton-in season liam taa an player pawimawh Matt Doherty leh Diogo Jota te an chan a, defender Jonny a inhliam bawk. City nen hian Jonny aiah Lyon aṭanga an lakluh Marcal-a'n bul a ṭan a, minute nga chauh a khel tihin coach hnenah inhliam vanga thlak a ngaih thu a sawi.

First half-ah Wolves an buai a, insiamṭhat an tum chhungin goal hnih an chhuah hman. Second half-ah erawh Wolves khelh dan a dang ta hret a, Daniel Podence a hmuhnawm hle. January thlaa Olympiakos aṭanga an lakluh Podence hian Ruben Neves-a'n chance ṭha a neih theih nan mawi zetin a 'dummy' a, amaherawhchu goal khung a harsat thung. Portuguese winger hi box chhungah nalh takin vir mah se goal zawnah a pet thei lo a, keeper Ederson chiah a hmachhawn hnuah chip tum mah se a pet over bawk.

Minute 78-naah Wolves-in goal an khung a, Podence-a cross ṭha zet chu Jimenez-a'n a tauh goal. Nuno Espirito Santo hoten beiseina nei chhunzawm mah se team ṭha zawk Man City-in injury time-ah Gabriel Jesus hmangin an khung belh a, team ṭha zawk 3-1 in an chak.

Wolves manager Nuno Espirito Santo chuan, "First half kan khel ṭha lo a, Man City-in ball an in pass ṭhat avangin kan tan harsatna an siam tam hle. Penalty kan chawi hnuah phei chuan kan tan a harsa lehzual. Chutihrualin chance pawh kan insiam a, Man City-in ball an chan tam loh nan kan dang chat tam hle. Amaherawhchu kan insiamṭha tlai a, kan duh angin a tawp kan khar thei ta lo," tiin a sawi. 

City manager Pep Guardiola chuan, "Kan khingpuite kan hrechiang a, khelh pawh an harsa a, chuti chung chuan kan khel ṭha hle. Kan bul ṭan dan a ṭha a, chutihrualin kan training dan leh team dinhmun thlirin talbuai hun kan neih kha chu ka rin dan sa a ni," tiin minute 90 chhung khel ṭha tluan lo mah se an khelh danah a lungawi thu a sawi.