Hyderabad tan Ramhlunchhunga

Ningani zan Indian Super League inkhel hmuhnawmah Hyderabad chuan 2-1 a an hnufual hnuin Jamshedpur FC chu 3-2 in an hneh a, an 'comeback' theih nana player langsar Ramhlunchhunga chu player of the match-ah thlan a ni.

Hyderabad hian minute 12-na lekah Muhammed Rafi hmangin goal hmahruai an khung a, mahse, JFC-in first half-ah penalty vawi hnih hlawh chhuakin, Javi Hernandez chuan goal-ah a chantir ve ve a, 2-1 in chawlhlawk an hmang.

Mahse, second half-ah Chhungtea siamsak ṭha zet chu Joseph Sunny chuan si phurh sut nan a khung a, Andrei Alba chuan goal khat a thawh ve leh bawk - goal dang a lut tawh lo a, 3-2 in Hyderabad an chak. Hyderabad tan hian Chhungtea bakah Isaac Vanmalsawma chuan inkhel bul a ṭan bawk.

Chhungtea chuan, "Tun season-ah beisei angin result kan nei thei lo a, chak loh leh draw a nih deuh reng avangin kan hnufual kha chuan beiseina a sang tawh lo. Mahse, theihtawp kan chhuah a, a tawpah kan 'comeback' leh thei ta a ni," tiin Vanglaini a hrilh.

Kolasib tlangval Ramhlunchhunga'n Player of the Match chawimawina a dawng a, tun season ISL-a he chawimawina dawng thei Mizo pakuana a ni - Lallianzuala Chhangte, Isak Vanlalruatfela leh Lalremsanga Fanai ten vawi hnih ṭheuh an dawng tawh.