Hneh theih loh an awm bik lo - Conte

Antonio Conte chuan football team zingah midang tana hneh theih loh bik an awm lo tih a sawi - Conte enkawl Napoli chuan Serie A season kal laia la tlawm miah lo Juventus chu zanin dar 10:30 hian an lo mikhual ang.

Naples club hian league match 21 an khelh aṭanga point 50 hmuin hma an hruai mek, an mikhual tur Old Lady hi tlawm la nei miah lo ni mah se, khelh zat inangah point 37 chauh an la hmu thung a ni.

Conte chuan, "Juventus ka enkawl hmasak aṭang khan kum 14 lai a lo liam tawh, sulhnu tam tak ka neih tawhna leh ka hriatchian a ni. Club leh player an ṭha em em a, khawvela a ṭha ber berte an ni hlawm.

"Tlawm miah loin Serie A season an hmang mek tih pawh ka hria, kan tan hmachhawn harsa leh hautak tak an ni dawn. Anni hneh tur chuan a tir aṭangin tihsual nei loa kan khelh tluan a ngai dawn hle tih pawh ka naute ka hrilh.

"Chutihrualin, tlawm loa kal tluang an nih avang hian midang tana hneh theih loh ngawt chu an ni bik lo - league match 21 chhung tlawm loa kaltluang thei ni mah se, hneh theih an ni tih hi kan hriat ve a ngai bawk," tiin a club hlui hneh a tum ruh hle.