Kane a insiam ṭhat a ṭul

Harry Kane-a'n Bundesliga match 16 aṭangin goal 16 a khung tawh a, top scorer ni mek mah se tun hnaiah goal khung a harsat. Bayern Munich striker hian November hnuah open play aṭangin goal a khung tawh lo a, match sarih chhung open play-ah goal a khung lo.

Bayern Munich hian zanin dar 8:00 hian SC Freiburg an tlawh dawn a, Kane-a'n goal khung ngei a tum dawn. English striker hian open play aṭanga goal a khung loh chhungin penalty aṭangin ṭum hnih a khung a, a zawn zatin club leh ram tan vawi 27 penalty aṭangin a khung.

Vincent Kompany hote hian kar laihawl Champions League inkhelah Feyenoord 3-0 in an hneh lo a, an ball chan zat erawh 80% daih a ni. Bayern tan hnehna chang turin goal khung a pawimawh a, Kane-a'n goal khung hna a chhunzawm a ṭul.

Bayern hi an elpui Bayer Leverkusen nen point li chauhin an inthlau a, Xabi Alonso hoten season bul ṭan ṭha lo mah se an insiamṭha leh tawh hle. Zanin dar 8:00 vek hian Leverkusen-in RB Leipzig an tlawh dawn a, Leipzig hi panganaah an awm mek.