AIFF-in state FA ṭanpuina sum a pe dawn

Indian football-a thuneitu sang ber All India Football Federation (AIFF) president Praful Patel chuan Thawhṭanni zan khan AIFF hnuaia state association presi-dent leh secretary-te kawmna hun a nei a, Covid-19 vanga sum lam harsatna tawktu State FA-te ṭanpui nan nuai 300 an sem tur thu a sawi. 

AIFF chuan State FA aiawhte hi a hran ṭheuha biain an sum mamawh dan an sawipui leh ang a, an mamawh dan azirin sum hi sem leh tur a ni .Hetihlai hian Western India Football Association (Maharashtra) leh Indian Football Association (West Bengal)-te chuan state dangte kianin sum hi dawn ve an tum lo. AIFF chuan Centralised Registration System kal tlanga player registration aṭanga an sum hmuh ṭhin vaibelchhe 1.32 pawh an âwl tur thu an sawi a, Academy Accreditation fee nuai 34.5 pawh lak loh tur a ni. 

Thawhṭanni zana AIFF President leh State FA hruaitute video conference hmanga indawrnaah hian Mizoram Football Association aiawhin president Lal Thanzara leh honorary secretary Lalnghinglova Hmar-te pawh an tel. State FA-te hian Covid-19 avanga harsatna an tawhte an sawi bakah football hmasawnna tura an ruahmanna hrang hrang an sawi lang a; October-ah inrawn khawmna hi neih leh tum a ni.