Villa chhantu Arsenal keeper hlui

Thawhṭanni zan khan Aston Villa-in Sheffield United 1-0 in an hneh. Arsenal aṭanga Villa zawmtu Emiliano Martinez-a'n goal luh hmain penalty a dang a, Villa hero a ni nghal.

Argentine keeper Martinez hian khelhna hmun chan a duh avangin pound maktaduai 20-in Villa a zawm a, FA Cup leh Community Shield-a Gunners nomawi chawipuitu a nih avangin a man a tam hi a 

mak lo.

Villa Park-ah winger Matt Targett-a'n minute 33-naah Blades player Chris Basham a tih tluk avangin penalty a chawi a, goal a la lut lo. John Lundstram rawn pen chhuakin ṭha takin pet mah se Villa keeper thar Martinez-a'n a dang ṭha hle.

Inkhelh banah Emiliano Martinez chuan, "A nuam khawp mai, hattrick siam ang mai ka ni. Dik taka sawi chuan ka dive-na lam tur pawh kha ka hre lo a, ka rinna lamah risk ka la. Penalty dang tur chuan vanneih a ngai," tiin a penalty save chungchang a sawi.

Aston Villa-in hnehna an chan theih nan minute 63-naah Targett-a corner pet chu Tyrone Mings-a'n tauh pialin Ezri Konsa-a'n a lu hmangin goal awmchhun a khung. Mikhual Sheffield United erawh an vanduai a, minute 12-na lekah defender John Egan red card hmuh vangin player 10-in an khel a, match hnih an khelh tawhah point an la hmu lo.

Sheffield United boss Chris Wilder chuan, "John Egan khan goal aṭanga yard 35-ah red card a chawi a, Matt Targett-a'n ball chhuhsak a tum lo chungin red card pek a ni lo," tiin referee Graham Scott-a thutlukna chu an chak lohna chhanah a puh.

Egan hian Villa player thar Ollie Watkins a tih tluk avangin red card a chawi a, hnawhchhuah theih loh dan awm bawk mah se Watkins hian keeper chauh a hmachhawn tawh dawn avangin red card pek theihna tur a ni.

Sheffield United-in penalty an hmuh hian Targett-a'n ball tel loin box chhungah Basham a ti tlu a, Villa winger hian goal awmchhun luhna turin corner a pet zui bawk. Blades boss Wilder chuan Targett hian ball a tum lo a, mihring chauh a tum avangin red card hmu tur a nih thu a sawi.

Premier League danah hian player-in ball chhuhsak a tum a nih chuan penalty chauh pek a, red card pek tel loh tur a ni. Tun ṭumah pawh hian Targett-a'n red card a hmuh loh chhan hi hemi dan vang hi a ni a, chutihrualin Blades boss Chris Wilder erawhin dan ang thlapa hnawhchhuah theihah a ngai thung.

Blades hian match hmasa bera Wolves an hneh loh ṭumin a tir minute rukah goal hnih an chhuah nghal a, 2-0 in an chak lo. League Cup-ah Burnley an hneh lo zui a, tun season match hmasa pathumah an chak lo vek.