Wawrinka leh a coach inṭhen

Stan Wawrinka chuan hun rei tak chhung a lo thawhpui tawh a coach Magnus Norman nen an thawhdunna a tawp thu a puang, season riat an inzui chhungin Swiss star hian Grand Slam title pathum a la.

Kum 35 mi Wawrinka chuan, "Kum riat zet ṭha taka kan thawh dun hnuah Magnus Norman nen inhriatthiam tawn-nain thawh dunna kan titawp. Hun nuam leh hlimawm kan tawng dun a, tennis ka khelh chhunga ka thlen san lai ber min thlen puitu a ni.

"A hnathawh leh ka tana a thil tih zawng zawng avangin a chung-ah ka lawm, coach ṭha tak a nih bakah ṭhian kawm nuam em em a ni tel bawk. Grand Slam nomawi pathum ka lak kha ani hi awm lo se la chuan ka la thei kher lo ang," tiin a sawi.

Swiss tlangval hi player theihna nei sang tak a ni a, mahse Roger Federer nen an ram a inang a, a ropui tur angin a lang ropui tawk lo. Rafael Nadal leh Novak Djokovic te hliahkhuhna karah pawh major title pathum chu a la thei tho.

World number 17 hi a vanglai a liam mek a, hliam a neih fo avangin a tla hniam ve tawh bawk. Tunah chuan kar leh aṭanga khelh tur French Open khel turin training a nei mek.