A vawi li nan Murray champion

Pathianni zan khan Andy Murray chuan Kevin Anderson hnehin Queen's Club champion nomawi a chawi. John McEnroe leh Boris Becker ten record an lo siam tawh nihrualin a vawi li nan a champion a ni.

London a khelh Queen Club, Aegon Championship final-ah hian Murray hian harsatna a tawk lem lo a, minute 64 chhung lekin 6-3, 6-4 in hnehna a chang.

South African Anderson hian set khatnaah first serve chu 78% zet ti dik thei mah se game li naah Murray hian a service laksakin set a la chho zui. Set hnihnaah pawh Murray hian a service a hum ṭhat bakah Anderson service a chhuh sak leh bawk.

Kum 28-a upa Murray chuan, "Ka duhthusamin ka khel thei, ka service leh ka forehand a ṭhat avangin ka dingchang niin ka hria. Ka ball vuak apiang kha ka ulukin point ka hmuh ngei theihna turin ka bei zui zel bawk. Hetiang hian khel chhunzawm zel thei ila ka duh hle," tiin a sawi.

Queen Club champion tam te:-

1. John McEnroe - 1979, 1980, 1981, 1984

2. Boris Becker - 1985, 1987, 1988, 1996

3. Lleyton Hewitt - 2000, 2001, 2002, 2006

4. Andy Roddick - 2003, 2004, 2005, 2007

5. Andy Murray - 2009, 2011, 2013, 2015

Queen's Club hi grass court tournament a nih avangin player tam takin Wimbledon inbuatsaih nan an hmang ṭhin. Khawvel player langsar zingah mi pasarih ngawt Queen Club an champion zawk chiaha Wimbledon champion zui an awm tawh nghe nghe. Heng zingah hian Rafael Nadal leh Murray te pawh an tel ve a ni.

Karleh maia khelh ṭan tur Wimbledon thlirlawkin Britain number 1 chuan, "Ka tan chuan Grand Slam tournament hi a pawimawh bik em em a, champion ngei pawh ka duh. Player ropui tak tak ten Queen Club an champion zawh chiahah an champion zui tawh ṭhin a, kum 2013 pawh khan kei ngei pawhin ka lo ti ve tawh bawk. Kuminah pawh hian beiseina ka nei sang ve hle," tiin a sawi.

Chelsea manager Jose Mourinho hi tennis inkhel ngainatu leh en peih ve tak a ni a, tunkar pawh khan Queen's Club-ah hian Murray-a inkhel hi a en.

Wimbledon leh Murray chungchang an zawhna chhangin Mourinho chuan, "Kuminah hian Murray hian Wimbledon hi chawi leh ngei se ka duhsak hle. Kum 2013 pawh khan a champion lai kha ka lo en tawh a, ka mittui a tla hial. Grand Slam dangte ai pawh hian a ropui bik em avang tennis player tan chuan heta champion aia hlu hi a awm thei tawh chuang lo ang," tiin a sawi.

Queen Club leh Wimbledon zawn thei te:-

Player Year

1. John McEnroe 1981 & 1984

2. Jimmy Connors 1982

3. Boris Becker 1985

4. Pete Sampras 1995 & 1999

5. Lleyton Hewitt 2002

6. Rafael Nadal 2008

7. Andy Murray 2013