Gerry Weber Open champion Roger Federer

Roger Federer chuan Andreas Seppi hnehin Pathianni zan khan a vawi riat nan Gerry Weber Open champion nomawi a chawi. Hei hi champion tam ber record thar a ni.

Germany, Halle hmuna inkhelah hian kum 33-a upa Federer hian 7-6 (7-1), 6-4 in Seppi hi a hneh. Swiss Roger hi he ATP Tour final-ah hian vawi 10 a inlanna chiah a ni bawk.

Tun season-ah Fede­rer hian champion no­mawi vawi li a chawina chiah a ni a, hemi hma hian Istanbul, Dubai leh Brisbane-ah te a lo champion tawh bawk.

Final inkhelah hian set khatnaah Seppi hian bul a ṭan fuh zawk a, 5-4 a hmahruaiin set point vawi hnih a hmu hman. Mahse, a hun ṭha neih a chhawr ṭangkai theih loh avangin 5-5 ni zui in tie break khelh a ni. Tiebreak-a point khat chiah hlohtu Federer a ding chang.

Set hnihnaah pawh Seppi bawk a che fuh hma­sa leh a, game nga­naah Federer service chhuhsak theihna hun a nei leh. Mahse set hmasa ang bawkin a hun ṭha a hmang ṭangkai thei lo nawn. Kumin kum tir Australian Open-a an inkhelhah Seppi hi lo chak zawk tawh mah se a vannei nawn tawh lo. Hun pawimawhah Roger hian a service chhuhsak letin hnehna a chang ta a ni.

Grand Slam vawi 17 champion tawh Federer chuan, "He tournament-a vawi riat zet ka champion thei hi ka lawm hle. Kum 2013 kha ka tan chuan hun harsa a ni a, kum 2014-ah ziaawm hretin kumninah chuan ṭha tak leh inring tawk takin ka inkhel mek a ni. Hetiang hian ka la inkhelh chhoh zel theih ka beisei," tiin a sawi.

June 29-a khelh ṭan tur Wimbledon atan Federer hi a inpuahchhah chho zel a, he tournament-ah hian vawi sarih zet a champion tawh nghe nghe.