Carroll a tan England-ah hmun a la awm

England manager Roy Hodgson chuan West Ham striker Andy Carroll chuan ngai a awh chho leh thei a nih phawt chuan a tan England squad-ah atan hmun a awm reng thu a sawi.

Kum 26-a upa Carroll hi West Ham-a season hnih a hman chhungin hliamin a tibuai deuh reng a, a inkhelh tam loh leh fit tawk loh avangin season hnih chhungin Premier League-ah goal sarih chiah a khung a ni.

Hodgson chuan England tana vawi kua lo inlan tawh Carroll chu a inpeih a nih phawt chuan a koh leh tur thu sawiin, "Player tu tan pawh kawng ka hawng ṭhin. Rickie Lambert leh Charlie Austin te pawh anmahni lam an inpeih avangin England tana khel turin ka ko a, ka tihsual lohzia chu kan hria a ni," a ti.

Liverpool boss hlui chuan, "Striker duhzawng emaw khelh dan duh bik ka nei hran lo a, a phu apiang ka ko mai ṭhin. Andy hian mi zawng zawngin kan lo hmuh tawh ṭhin a theihna ang kha a pholang leh thei a nih phawtchuan kan mamawh chhanna a ni thei a ni," a ti bawk.

Hodgson chuan sawi chhun­zawmin, "Engkim hi ama kutah a innghat vek a ni. A hliam vangin duh angin a inkhel tam thei lo a, a vanduai hlein ka hria. Mahse Phil Jones-a'n a hliam te a dam hnua ṭha taka a khel leh thei ang khan a tih ve theih ka ring tlat a ni," tiin English striker pasang chu a ṭhat chhoh leh theih a beisei hle.

British player zinga man to ber Carroll hian England tan vawi kua a inlanah goal hnih a khung tawh a ni.