Neymar tel lohna Brazil an chak
Brazil-in group match hnuhnung berah Thiago Silva leh Roberto Firmino te goal hmangin Venezuala 2-1 in an hneh a, Copa America quarterfinal an lut.
Group C inkhel dangah Colombia leh Peru te goal awm loin an inhnehtawk a, quarterfinal an lut ve ve bawk. Colombia hi pathumnaah awm mah se Group A pathumna Ecuador aia an goal difference a ṭha zawk a, an vanneih phah ta a ni.
Quarterfinal hi Ningani zing dar nga aṭanga khelh ṭan tur a ni a, ni khatah match khat zel awmin Pathianniah khelh zawh a ni ang. Chile Vs Uruguay; Bolivia Vs Peru; Argentina Vs Colombia; Brazil Vs Paraguay - Brazil te hi Pathianni zing dar 3:00-ah an inkhel ang a, a bak zawk hi zing dar 5:00-a khelh tur a ni.
Brazil-in match li chhung hrem vangin captain Neymar an chhawr thei dawn tawh lo a, FIFA World Cup semifinal-a Germany an hmachhawn tur ang lo takin mittui a tla tawh lo a, uchuak takin Brazil player-te'n an star player an thlah tawh lo.
Neymar awm loh ṭumah Brazil ang bawka Santos aṭanga larchhuak Robinho a ṭangkai a, Manchester City forward hlui hian goal khung lo mah se team chakna a ni.
Robinho hi mamawhna hmunah a awm a, ball a hloh lo a, a khelh dan ngai rengin a khel thei a, cool taka a khelh zarah a teammate-te'n game ṭha takin an khelh theih phah. Minute 72-naah Robinho aiah Marquinhos luh tir a ni a, Santos forward chhuah lai hian Brazil supporter-te'n standing ovation an pe hial.
Inkhelh ṭan aṭanga minute 9-na lekah Robinho corner chu PSG defender Silva-a'n a volley goal nghal a, a kawh em avangin Venezuela keeper Alain Baroja tan dah theih a ni lo. Baroja hian minute li hnuah Silva tauh goal tur a dan sak leh bawk.
Second half ṭan aṭanga minute ruknaah Chelsea duo Willian leh Filipe Luis te thawhrah sengin Firmino-a'n Brazil goal hnihna a khung. Hoffenheim attacking midfielder hi Colombia an hneh loh ṭuma a chet ṭhat loh vangin an dem a, goal hmangin sawiseltute a chhang let.
Minute 84-naah Juan Arango freekick chu Brazil keeper Jefferson-a'n dang mah se a per chu Venezuela substitute Nicolas Fedor-a'n goal-ah a chan tir a, hun tawp boruak a nung sawt nachungin goal a dang a lut tawh lo.
Brazil 2-1 in an chak a, Paraguay hmachhawn turin quarterfinal an lut.
Brazil coach Dunga chuan, "Copa America inelna hi a harsa a, goal khat baka chak thei chu Chile chiah an la awm. Player pakhatah chauh kan innghat lo tih kan lan tir a, goal khata kan chak kha tun dinhmunah chuan a tawk a, inrintawkna nen ṭha zawka kan khelh zel theih kan beisei," tiin a sawi.
Besei pha lo Falcao
Chelsea-in lak luh an tum avangin Colombia forward Radamel Falcao-a'n ngaihven a hlawh a, Manchester United forward hlui hian Copa America khelh tawh chinah amah belchiangtute bei a ti dawng hle.
Monaco striker hian goal a khung lo a, Real Madrid midfielder James Rodriguez a chet ṭhat loh bawk avangin Colombia-in goal an khung lo. Falcao hi minute 65-naah Jackson Martinez-a'n a rawn thlak.
Real midfielder Rodriguez chuan, "Khelh ṭhat loh chuan result ṭha lo zawk kan nei a, a tuartu chu keimahni bawk kan ni. Copa America hi champion kan tum a nih chuan tun aia nasa a kan beih a ngai a ni," tiin a sawi.
Colombia-in point thum an hlawhchhuah theih loh avangin pathumnaah an awm a, quarterfinal-ah Group B hmahruaitu Argentina an tum a ṭul phah.
Quarterfinal Fixtures
June 25, Ningani
QF1 : Chile 5:00 AM Uruguay
June 26, Zirtawpni
QF2 : Bolivia 5:00 AM Peru
June 27, Inrinni
QF3 : Argentina 5:00 AM Colombia
June 28, Pathianni
QF4 : Brazil 3:00 AM Paraguay
Semifinal Fixtures
June 30, Thawhlehni
5:00 AM Quarterfinal 1 Vs Quarterfinal 2
July 1, Nilaini
5:00 AM Quarterfinal 3 Vs Quarterfinal 4