Ṭul lo a pawisa hman tum lo Bilic

West Ham manager thar Slaven Bilic chuan nipui transfer-ah pawisa hman huau huau a tum loh thu sawiin fimkhur taka player an lak tur thu a sawi.

Season hmasa Pre­mier League-a West Ham 12 na nihpuitu Sam Allardyce thlaktu Bilic hi Hammers hotu te'n a player duhzawng lakluh nan pawisa tam tham tak an pe dawn nia sawi a ni a, mahse Besiktas boss hlui hian awmze nei loa sum hman a tum loh thu a sawi a ni.

Croatia manager hlui Bilic chuan, "Transfer-ah hian player ṭha tak tak lakluh kan tum ngei a, mahse ṭul loa pawisa khawhral turin kan hmanhmawh lo ang," a ti.

Fair Play lawmman hmanga Europa League khel tur West Ham hian Pedro Obiang leh Bir­mingham City player Darren Randolph te chu tun nipui transfer-ah an la lut tawh a ni.