England chhandamtu United rawlthar Lingard
European U21 Championship-ah England-in minute 85-naa Substitute Jesse Lingard goal hmangin Sweden 1-0 in an hneh.
Pathianni zan inkhelah England boss Gareth Southgate-a'n Portugal hneh loh team aṭangin player a siksawi a, starting eleven-ah Liverpool player thar Danny Ings tan hmun a la awm lo cheu.
Tlar hmaah Tottenham Hotspurs forward Harry Kane awm mah se England-in minute 45 chhungin goal an khung thei lo. Manchester United nena sawi zawm Kane bakah Arsenal defender Carl Jenkinson ten chance ṭha an hlah.
England tlar hnungah Middlesbrough defender Ben Gibson a che ṭha a, keeper Jack Butland-a'n hna a nei meuh lo.
Second half-ah goal beiseiin Liverpool forward Ings a lut nghal a, minute 55-naah Manchester United rawlthar Lingard a lut ve bawk.
Hun tawp hma minute nga chiah a awm tawh tihin Sweden goalkeeper Patrik Carlgren hnek chhuah chu penalty area pawn chiah aṭangin Ligard-a'n a chest a, nalh takin a volley goal.
Manchester United youth system chhuak Lingard hi club tan vawi khat a khel tawh a, intuai hriam turin Leicester City, Birmingham City, Brighton & Hove Albion leh Derby County-ah te a khel tawh bawk.
Kum 22-a upa Lingard chuan, "Vawi leh khata goal-a pet duhna kha ka nei a, vannei takin a lut zui bawk. Chakna goal ka khung avangin ka lawm em em a ni. Chak turin kan inlungrual a, kan thawkrim bawk. Point thum kan hlawchhuah takah chuan pressure kan nei tlem sawt e," tiin a sawi.
England coach Southgate chuan, "Player pawimawh pahnih (Saido Berahino leh John Stones) te inhliam hi kan tuar a, kan match hmasa bera kan chak loh avangin sawisel kan hlawh bawk. Tunah chuan kawng dik kan zawh leh tawh a, sawiselna lak aṭangin kan beng kan chhu ngawng anga, theihtawp chhuahin kan khel zui ang," tiin chak chhoh zel an tum thu a sawi.
Euro U21 hi kum 21 hnuai lam tana buatsaih ni mah se qualifier aṭangin kum zat tur hi an bithliah a, final round an thlen meuh chuan kum 23 tan pawh khelh theih a ni. 2015 Euro hi kum 1992-a piang chin tan a khelh theih.
Inkhel dangah Portugal leh Italy goal awm loin an inhnehtawk. Portugal hian point li hmuin Group B hmahruaitu an ni a, England leh Sweden-in point thum ve ve hmuin an dawt a, palinaa awm Italy-in point khat an hmu ve tawh bawk.
Group khat aṭangin team pahnihin semifinal an lut dawn a, Group B aṭangin team paliin beisei tur an la nei vek. Group A-in zanin ah an match hnuhnung ber an khel dawn. Group hmahruaitu point li hmu tawh Germany leh Czech Republic (3 Pts) an inkhel ang a, Denmark (3 Pts) leh Serbia (1 Pt) te an inhmachhawn bawk ang.