100m youth record siamtu Hill

Washington state Seattle hmuna neih invitational meet-ah kum 16-a upa US high school zirlai Candace Hill chuan 100m intlansiak world youth record a siam.

Hill hian 100m hi second 10.98 chhungin a tlan theng thei a, kumin May thlaa Dina Asher-Smith-i'n record a lo siam tawh 11.02 sec chu a rawn khum a ni.

Kum 16 chauha upa la ni mah se kuminah Hill aia hmeichhe tlan chak hi khawvelah mi pakua chiah an awm. Chung zingah chuan Jamaican sprinter Olympic leh world champion lo ni tawh Shelly-Ann Fraser-Pryce pawh telin ani hian 10.81 sec chhungin 100m a tlan thleng thei. Tuna hmeichhe senior 100m World record awm lai chu kum 1988 a American Florence Griffiths-Joyner-i'n a lo siam tawh 10.49 sec a ni.

Youth record thar siamtu Hill chuan, "Ka lawm lutuk kha sawi tur pawh ka hre lo hial zawk. He hmunah hian record siam tuma lo kal ka ni hran lo a, ka theih tawpin intlansiak ka hmachhawn tawp mai a ni. 100m hi second 10.98 chhungin ka tlan theng thei ang tih hi ka ring lawk bik ngai lo, mahse a thleng miau si. Hmasawn zel turin ka bei chhunzawm ang," tiin a sawi. Nakum nipuia neih tur Rio Olympic a tel theih ngei tumin Hill hian inbuatsaih zui nghal a tum a ni.