Fiorentina boss thar Paulo Sousa

Italian club Fiorentina chuan FC Basel coach hlui Paulo Sousa chu an coach thar ni turin nimin khan an la lut.

Fiorentina chuan an coach ṭang lai Vincenzo Montella chu Fiorentina enkawl reng chunga Napoli leh AC Milan indawrpuina neiah puhin a hna aṭangin tun thla tir khan an chawlh tir a, Montella thlak tur hian Sousa hi an la lut ta a ni.

Paulo Sousa hian kar hmasa Nilaini khan Basel-a a hna chelh lai chu a bansan a, Pathianni khan Fiorentina a zawm tur thu hi puan a ni. Portugal midfielder hlui hian player a nih laiin Juventus, Inter Milan leh Parma tan a lo khel kual tawh a, Serie A-ah hian a mikhual lo.

Swiss Super League-a Basel champion puitu coach hian coaching lamah pawh tawnhriat a nei ṭha hle. British club QPR, Swansea City leh Leicester City te a lo enkawl tawh a, Hungarian club Videoton leh Israel club chhuanvawr Maccabi Tel Aviv te a lo enkawl tawh bawk a ni.